منتديــــات الكاسنجــــــــــــــــــــــــــــــــــــــــــــر

أهلاً وسهلاً بك في منتديات الكاسنجر
عزيزي الزائر الكريم .. زيارتك شرف لنافي المنتدي ، ولكننا نطمع في تسجيلك معنا

للتواصل بين ابناء الكاسنجر بالداخل والخارج وكل الراغبين


    دفتر الأستاذ / وراق المجذوب

    شاطر
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    دفتر الأستاذ / وراق المجذوب

    مُساهمة  زاهر سر الختم في الإثنين 3 مايو 2010 - 14:33

    هاك يا وطن
    ــــــــــــــــــــــــــ
    هنا كان وكان
    ياما الزمان هنا شافلو شوف
    وأيام زمان كانت في شان
    شان ولا شان
    هيا يا دواهي الترجمان
    فضفض حديثك يا هو دا البركل جبل
    فوق رأي وشامخ برمكي
    وداكـ الكرو الفي غارو كم ريشة وحكي
    وديك الترابيل نوري
    شوف داكا المكان والقدس وين !!
    الداهي يوم من ميسو للدلتا وفلسطين
    هبهبت ساريتو رطن الصولجان
    دي حكاية من كمين سكات
    خصلة شعر مضفورة من داك المشاط
    من منا وأبكار النحل
    فوق كل ضامر وصافنات ترد الفريق
    وتبقى الخبايا عصية في كيراً غريق
    والهام يهم
    ويتعافي من وعرو الطريق
    يبسم بسمت المستفيق
    آن الأوان
    ما دلا والحمداب بقت ست الحسان
    يادى المسافة ودا المضيق
    العترة كانت والشهيق
    قبال بسمت المستفيق
    كيف والزمان بقي ما الزمان
    في غفلة يوم صن المكان
    وكتم الهوان نفس القطر
    والورشة صفارت الدغش
    والزهراء والجلا كربكان رقدن طرش
    والهاش يهش
    لا الداني مس ضرع اللبن
    لا الكان بعيد صنقر يخش
    يادنيا كرمة كريمة وين
    وداك الرصيف الكان تملى يضج رنين
    وسكن الوجع في المصنعين
    وين ود عقيد
    وودجابو وين
    وعووضة وين
    والحين يحين
    كرقيلى يتغارر سماح
    كرقيلي يتمايل طرب
    كرقيلي زواري السمات
    فوق الجبال بقي شيخ وأب
    كرقيلي منصوري الملامح والمكارم والحسب
    كرقيلي كاسنجاري
    عرقو إتمدا لا جبلْ السويقات كَرْكَرَبْ
    سد البحر للإنجليز سو العنابر وما نفع
    يتعدو بي نفخ القرب
    كرقيلي يا سوداني كبْ
    كبْ..والمضيق بقبق بريق
    زمزم رئاتو عَبيق عَبيق
    أفو يا هوان رايك فتر
    دي كريمة مروى بقت مبر
    عندك خبر
    والا الخبر خبرالبطير من مروى فر
    دولي المطار
    فاتحات جوازاتو ووكالات السفرْ
    عمان نفر تونس نفر
    لندن نفر باريس نفر
    ويا بختو من نوي للحجاز حج وإعتمر
    دي حكاية
    والبنطون صباحو أصبح على
    ولقي نفسو من ماضي الزمان
    ما دلا سد مروي البقيت في كل لسان
    مين كان يصدق
    إنه دا العتمور يلين قلبو الحجر
    ويتهادى يبقى أمان
    سنابل وبستنه وحزمة بِشر
    ومين كان يظن في يوم تكون
    مروي السليم فركة بصر
    ومين كان يخت
    في بالو أنه كريمة عطبرة
    تبقي ساساق دنقلا وعبري
    وهناك شلتين
    بما حمل البعير وهلم جرا
    وبيوضا
    نايري وهاده من خضره ومتر
    دي العافية يا من شاف وعاش
    من مروي تتغارر كما وادع الفراش
    تنزل على كبد الوطن
    وين كان وين نسمة ودعاش
    ويغني مسدارة الطروب الفنجري
    يا حلفا هاشي تنوري
    يا نمولي باشي تنوري
    كدي يا الجنينة تنوري
    يا كسلا زينة تنوري
    فوق فوق وجوهنا تنوري
    فوق فوق أرضنا تنورى
    هيا جيهه جيهه تنوري
    وتجى راجعى تاني تنوري
    ونطرب طربنا الفنجري
    ما دل والشريان يغازل كردفان
    ما دلا والتمتام فصاحتو عيان بيان
    يا دى الجمايل وبشرياتك يا زمان
    هل من مزيد
    يا مستعان يا مستعان
    يا مستحق الحمد يا رب الجميل
    يا من لك الكن والمشيئة
    وحسبنا ونعم الوكيل
    من ديك دواية ود بليل
    وتقابة تقابة القريبة وشيخنا ود حاج
    ولا ولاد جابر ضليل كاب فوق ضليل
    وداكا النضيق العندو مختصر خليل
    وشيخ احمد الصادق
    ولا كان متلو عن مالك قبيل
    نبنيها داراً تجمعن
    وتجمع معاهم ما يطيب
    قول اللبيب مادح الحبيب
    على ود حليب
    وما ننسى حاج الماحي من داك النصيب
    وقول كل من حمس شتم ونقرش دفيف
    ودآمنه والشيخ القريشي
    وود شبو وصايغ الجريف
    ومن داك بشير الخير وود سوركتى
    وما فات ذكرو ضيف
    لا بت مسيكابي
    وسوالف نعمة في النسب الشريف
    يا مستعان يا مستجيب
    دعوانا آمين يا مجيب
    آمين وآمين
    واللطايف يدنى الهاما ويغيب
    من جاي يجيب؟ من جاي يجيب؟
    قوقاي قماري رطن بليب
    زبد الطنابير والدليب؟
    والا القوافي المن حسونة
    كأنو تغريد عندليب
    مزمار يدوى يناجي في الوادي الخصيب
    رتعن شوادن الراى
    وود عبد العزيز وريحت التراب
    وناديكا غيمت السر هناك والهمبريب
    طاب خاطرو طيف حمد سعيد
    وحميد يهمهم من بعيد
    السره جات في توب جديد
    غسلتو بي مطر النشيد
    مادلا يا مطراً هطل
    فرك الدهاده والقميد
    وغنوم على سدر الجبل
    يى داك نصيح يى داك فصيح
    جرجر عصاتو هناك محل
    ما السد وقف في زى مليح
    خبالو كومين جاي وجاي
    والكبرى هاي عالي وفسيح
    غنوم وراء أبدوم غز رايتو
    ومروي جدة بساطة ريح
    غنوم يى داك
    غنوم هناك غنوم وراك
    يا داك وداك والمصنعين
    ويجن رفاقتكن كمان
    وحس المكن ينبح نبيح
    وغنوم يشيل الهم يقوم
    كان من هناك أو من هناك
    الماضي خترو الجاي هاك
    يا داك هاك
    يا داك هاك
    هاك لم تشبع يا وطن
    هاك لم يابا اللقمة فاك
    هاك لم تشرق يا وطن
    هاك لما تبقى الجقمة كاك
    هاك يا وطن من داني هاك
    هاك يا وطن من منا هاك
    غنوم يى داك
    غنوم هناك غنوم وراك
    هاك يا وطن هاك يا وطن
    غنوم وراك غنوم وراك
    وراق المجذوب محمد الماحي


    الخرطوم: 13/2/2008م
    avatar
    Admin
    Admin

    عدد المساهمات : 51
    نقاط : 96
    تاريخ التسجيل : 26/04/2010
    العمر : 39
    الموقع : امدرمان-امبده-ح27-منزل 327

    رد: دفتر الأستاذ / وراق المجذوب

    مُساهمة  Admin في الأحد 9 مايو 2010 - 5:03

    اتشكر ونحى شاعر الكاسنجر الاول حفيد حاج الماحى ...
    وواصل سعيك واصل واصل , ونتظر الكتيرررررررررر من شعراء الكاسنجر
    avatar
    مرتضى خليفة

    عدد المساهمات : 175
    نقاط : 289
    تاريخ التسجيل : 11/05/2010

    رد: دفتر الأستاذ / وراق المجذوب

    مُساهمة  مرتضى خليفة في الثلاثاء 11 مايو 2010 - 10:42

    التحية لك الاخ زاهر وانت تنقب فى دفتر هذا الشاعر الكبير صاحب المفردة الجميلة والذى يعتبر من اكثر الشعراء المظلومين اعلاميآ واكاد أجزم ان عدد مقدر من محبى الشعر- وانا منهم - لم يسمعو بهذه القصيدة رغم انها من أجمل القصائد التى كتبت .. نتوقع منك أخ زاهر الابحار فى مفردات هذا الشاعر القامة واخراج الدرر واللآلى واظهار الابداع الادبى لكل ابناء المنطقة وما أكثرهم
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / وراق المجذوب

    مُساهمة  زاهر سر الختم في الأربعاء 12 مايو 2010 - 13:42

    الأخ الفاضل / admin
    اشكر لك هذا التواجد علي دفتر الاستاذ/ وراق المجذوب
    واظنك من الذين يحفظون كثير من نصوص وراق
    ننتظرك علي هذا المتصفح

    وسلامات
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / وراق المجذوب

    مُساهمة  زاهر سر الختم في الأربعاء 12 مايو 2010 - 13:47

    أخي / مرتضي
    وراق من الذين ظلمهم الإعلام أو الذين ظلموا أنفسهم كحال الشعراء أصحاب الأقلام من اجل الشعر .. وما نقص كان واجب علينا نحن اتمامه
    وبالرغم من أننا أتينا انصاص الليل ،،، لكن القمر مازال صبياً للتواجد علي ضفاف الكاسنجر
    وأنا أخطط بإذن الله لحوار مع الأستاذ / وراق وكنت أود أن يكون بداية لهذا الدفتر
    وبإذن الله نحاول ذلك متي ما التقيناه
    دمت بخير
    وسلامات
    avatar
    مرتضى خليفة

    عدد المساهمات : 175
    نقاط : 289
    تاريخ التسجيل : 11/05/2010

    رد: دفتر الأستاذ / وراق المجذوب

    مُساهمة  مرتضى خليفة في الأحد 16 مايو 2010 - 9:02

    أخ زاهر لك التحية نحن فى أنتظار القصائد الجميلة والكلمات المموسقة من شاعر المنطقة وراق المجذوب وأتمنى أن تلقى نظرة أيضآ على المجادعات الشعرية الجميلة بين شعراء المنطقة من عهد على ودعود الى عوض التومى وطبعآ الموضوع ماساهل ومحتاج لبحث وتنقيب وماعارف الأخ سيداحمد سراج ليه غايب عن المنتدى وللا النت هناك ماواصل
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / وراق المجذوب

    مُساهمة  زاهر سر الختم في الأحد 16 مايو 2010 - 12:55

    الأخ / مرتضي
    أشكر لك المتابعة لدفتر الاستاذ / وراق
    وانا علي اتصال به وتقريباً نلتقي خلال الاسبوع القادم باذن الله و كان الله هون ... وعندها سيكون هنالك كلام اخر علي صفحات هذا الدفتر
    دمت بمودتي ..
    وسلامات
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / وراق المجذوب

    مُساهمة  زاهر سر الختم في الأحد 16 مايو 2010 - 12:58

    مُركَب طه ود الدُوش
    ــــــــــــــــــــــــــ
    مُرْكَب طه ود الدُوش
    تعدِّي شَرِق
    تعدِّي غرِب
    فرَح ..
    أتراح
    كرامات ... بُوش
    وهيطِي ..
    وسيعِي ..
    ثابتِي علي صفِحْةَ المُويَة
    شايلِي خَلِق
    جيوش .. وجيوش
    خدار السوق ..
    رواحلَ الناس ..
    شوَّالات .. قُفاف وقشُوش
    محمد عيسي
    وازِنَه تَبْ
    تقُول داك الفرِش
    منقُوش
    مسكِّنَه لاب تَمِتَّ المُويَة
    لا يوم أتكَسَر جاقُوسْ
    عديلِي الخطوة فيها
    خلاص
    سريعِي تسابِِقْ الرفَّاس !
    وإن نزَل البحر
    و إن فاض
    مركب طه ودالدُوش
    ما بِتَبِل كُراع الناس
    تَلِمْ أطرافَه
    في الحَجْرَة
    وتمُرْقَك في البَراحَة يباس
    وسبيل الصافي
    ديمة ملان
    نضيفِي معلَّقَة الكيزان
    صاقِطْ زِيرَه …
    يُوت نديان
    للسوَّاقة والحيران
    ولي أبْ جوفاً شِحِبْ
    عطشان
    وعُمْرَك ماب تقيف عِنْ بابَه
    ترجَع منُّو
    ماكْ رَوْيان
    ودربَ السُوق
    يلِمْ خلْقَ الله
    معلوم
    عِنْ سبيل الصافي
    ضاج بالحَرَكة
    يوم ما زلَّه
    ...
    ومركب طه ود الدوش
    مُشْرَعَه بي ِتحِتْ
    في الحِلِّة
    السفّار تقوم تندلَّى
    والمركب تفضِّي وتملا
    جايطِي الحلَّة
    عامرى الحلّة
    ما وقَف الدرِب
    من قِلَّة
    ما وقفَت حياة خلق الله
    الحاج يجري
    للبابُور
    يفرِّق مويتُو
    للمعذُور
    وطه علي سلامتو
    غيُور
    يغيّر زيتُو في كُلْ دُور
    ووكتين يحْصِلْ المقدور
    ودالماحي للواجب
    يغيِّر
    ويجبر المكسور
    والمصنع عجلتو تدُور
    وناس عبد الرحيم
    وحَمَد
    وعبد العاطي
    قطعُوا بحور
    والحسُّون وناس وَدْ حاج
    وبكري
    يشقِقُوا العَتمُور
    سِنين تعقِب مدارَه شهور
    ودائر يا زمن بتدُور
    ومقسومة آ لُقُمْةَ العْيش
    القسمه آ لُقُمْةَ العْيش
    تشيلَِك من صحَن جبَّار
    تختَّك في خَشم درويش
    والقِسْمَة
    آ لقمة العيش
    تشيلِك من بلاد
    لى بلاد
    سفراً ليهو طبقُوا الخيش
    والقسمة
    آ لُقُمْةَ العيش
    تفرِّق حبَّة القندول
    مِنّ اخواتَه
    للمكتوبة ليهُو
    سبَب .. عليها يعيش
    والقسمة آ لقمة العيش
    تصحِّى الحاج
    تصحِّي صهيب
    قبل الفَجَّة بدري دِغِْيشْ
    رزقاً في بطون النيل
    وما بَخَتَا البَصارة
    وصولو
    لا تهويش ولا هبِّْيش
    والقسمة ..
    آ لقمةَ العيش
    تسُوق ناس أبنعوف
    وورَّاق .
    للسفر البعيد وطَشيش
    دي القسمة ...
    آ لقمة العيش
    حسن وعبد الحيمد
    والحاج
    وخضر وعثمان
    قادوا وردَّفوا الحيران
    مشاوير خالدة
    دين مكتوب
    وما مطلوب وما محسوب
    أفتَح يا كتاب الدين
    ويا تاريخ بدُر
    وصفين
    أبجد وفهرس الآيتين
    يمين ده الدين
    دين الفُضلاء..
    أجوادين
    ودِيلَه يمين
    في اليوم يمشُوا
    ستة سنين
    وستة سنين
    يتاتُوا عقول
    يتاتوا علي مدار الحُول
    نُور مشتُول
    وسيف مسلُول
    وزاد موصُول
    في قَلَم الولاد
    والقُول
    الحياة يا عباد اللّه
    بتدُور الزاد
    عشان درْبَ الزمن ماشي
    كم راحلين
    وكم قادمين وكم سُرَّاي
    وكم زهَّاد
    وأيام تجري تتوالى
    زي دار تسبْق الميعاد
    وأحداث ماشي
    تتعاقَبْ
    فرَح .. وانكاد
    وداير كاسِك ..آ.. الأيام
    تمدِّي عسَل
    تصفّي
    تطيّبي المُشْهاد
    وقَبْلَ النوم يتِبْنَ العين
    تقِلْبِي الحالة
    شُوم ورماد
    القول ما بْدُورلُو كتاب
    والدرِبْ ..آ ..رفاقَة
    طــــويل
    لا ضَرا يحجا لا اصحاب
    لا أماً تلِمْ ولدَه
    لا أختاً تخًمْلُو تراب
    لا أبو .. لا أخُو ...
    ولا مال
    ولا جاه لا حَسَب
    لا أنساب
    حباب الدنيا ..
    ألفِ حباب
    أبداً ماب نَسِدْلَها باب
    نصيبنا نشِيلو منَّها كُلُّو
    وين ما يبقىنمشِيلُو
    ونرجاهُو إن حَضَر
    و إن غاب
    عشان تَب مافي ليها أمان
    والمالْيهُو امان
    لابدَّ نعْمَل ليهو ألفِ حساب
    نحْنَ ضيوف ...
    كلَّنا فيها ِنحنَ ضيوف
    نوهِّط دَه
    ونودِّع دَه
    ويوم وِهِّْيطنا ...
    ما معروف
    وماب ننسَى الرحيل
    يا دنيا
    مافي شَماتَة منُّو ..
    وخوف
    وكُلَّ الخوف من القِدَّام
    من شبراً رقادُو
    طــــــــــويل !
    وزادو قليل
    ومن يوماً وقافُو
    طـــــــــويل
    خمسين ألفِ عام
    فوق عام
    وحُسْنَ الخاتْمَة
    أغلي نصيب
    مِن الدنيا الحياتَه
    رهان
    عِين يا مستعان
    سُبحان
    ألطُف يا مجيد رحمان
    وكْتَ التُور يغُزْ قَرْنُو
    ويصَل عِنْ بابنا
    بالهدَّام
    الزمن آ صحاب جاري
    وما دار راحة
    دي الدنيا
    عايرى مصيِّدي وفارِّي
    وفيها الدار ينوم
    يرتاح
    تفُوتُو ضحا ...
    التقول طايري
    والحياة يا صحاب
    ماب ترحَم المنضاري
    والجاري
    بسأل نفسي كم مَرَّات
    واسألكم عَشُرْ مُرَّات
    باقِيلْكُنْ
    بيَرْجَعْ تانى ؟؟
    زمناً صافي ولّى
    وفات ؟!؟
    زمَن الساقي
    قلْعَ المَتَرَة ...
    والنُورِْيقْ
    والفَزْعات
    والساقي أرِّقْ
    البَرْوِدْ طلاقات
    ديّرو المرحات
    من التقْنَد تغدِّي
    تفطِّر الِملحات
    السَبَرُوق والكلِّْبيق ...
    لسان الطير
    والوِرِّْيق
    يفوق اللَجْمَرِي
    الملحات
    زمناً كان سَمِح
    صافي
    البال فيهو متعافي
    الحياة رايقِي
    متكافي
    الناس عايشَة
    سُتْرَة وصُلحة
    بالفي يعوِّضوا المافي
    زمناً صافي
    فات ... ودَّع
    وعهداً تاني ماب يرجَع
    عارفين ليه .؟.؟.
    تاني الفاتنا ماب يرجَع
    عشان جاري الزمن
    قدَّام
    ولى ورا عُمْرُو ..
    مابْ يرجع !
    دا جاري جَرِيهُو
    لا بِِسْتنّى
    لاب تلقاهو يتسكَّع
    ولا يوم تسمعُوبُو
    وقَع
    وحبُّوب طه ود الدوش
    يعدِّي غَرِب
    يعدِّي شرِق
    ما بتمدّه وكْتَ القِيْلة
    زيّنا للضِليْل
    يحَدِق
    معفِّن حلفِيه في الحَجْرَة
    واللَشْمِيْق
    من المُشْرِقْ
    ينفِّض
    تلقى في المُسَّار
    ويفْتِل
    ويِتْلَفِتْ يَنْتِقْ
    وخات حُقّةْ صَعُوطُو
    ملانِي
    دايماً ليها متشَوّق
    ومَرَّات تلقّى في الصنَّانَة
    قاعد في الخدار
    يَعَزِقْ
    ومَرَّات تلقى عادِل مُويْتُو
    يسقي
    مكبّر الِمرْتِق
    ما دخَّل فرِض في التاني
    صلاَّي طه
    صوَّامي
    طه الما هَبَش حَقْ غيرو
    طه بشُوشْ وإكرامي
    وطه مَحَلْ تبَتِّقْ
    تلقى
    ناقِدَه لامَّها وخامِّي
    وطه الما أتكرم من مرقة
    ديمه حمارو
    قدامي
    وطه يسوّي يا رامي
    للسَوَّاقة والحيران
    وللشرشر مناجلو
    سنان
    وللسفَّار يتِب عجلان
    والناس لو بقت
    زي طه
    ما كان
    ناس شمال الأطلسي
    وناس وارسو مسكو
    عنان
    ولا كان تل ابيب
    كانت
    ولا اتفرّقنا
    لا اتمزّقنا
    لا أتهنا
    لا اتمدَّه فوقنا لسان
    فلسطين يا جروح الذل
    غزه الضفه والجولان
    والقدس
    ودمار لبنان
    يا عالم معالم الدنيا
    نيران
    واقدي كلَّ مكان
    وحتي عقيدة الرحمن
    تُقْصَف وتُحْرَق الأفغان
    العالَم بَدُورْلُو
    عُمَرْ
    بدُور خالد
    بدُور حيدر
    بدُورلو درر
    أخْطِب يا عُمَر وانْهَر
    هِين النَفْسِ
    هِين الدنيا
    مادام عقْلَها إتجبَّر
    وما دام شرَّها اتجسَّر
    ومادام خيرَه
    إتغيًّر
    وطيِّع يا علي البَنْدَر
    وُقُود يا خالد الفرسان
    شرّقِ وغرّبِ أتنتَّر
    ما بيِسْتَحْمَل العالَم
    أكْتَر مِن دا
    ما بَقْدَر
    وكان بَسْ ناقْصَك الفرسان
    بورِّيك في بلدنا
    نَفَر
    مضمُون طه ود الدُوش !
    مضمون
    ما بَدُور شاهِد
    وكتِيِرين زيُّو ود الدوش
    بَسْ كِيفِن تجُوا
    آ خالد
    وبس كيفِن يجينا عُمَر !؟
    و يجينا علي ؟!
    بلاكُن ما أظنّها تصفَى
    يا خالد
    وبلاكُن ماب تطِيع الدنيا
    لا بي حارَّة
    لا بارِد
    بقِينا علِْيكُم
    آ خالد
    ولا تتأخرُوا
    آ خالد
    أنتو معايا
    يا أخوانَّا
    أنتو مصدِّقين القلتُّو
    ولاَّ القلتُّو
    مُو حالْنَا
    بمشي انا مِن محلِّي بَعِيد
    للداير يقول
    غِْير قولِي
    ولا َّالما طَرَق بالْنا
    والشي الدايرَ أقُولُو
    أخِير
    لا تنْسُو ا.. إنُّو نِحْنا بِخير
    أو مُمْكِنْ نكون
    بي خير
    نِحنا الدنيا
    نِحنا البي نمشِّيها
    ونسُوقا عديل
    ونِحنا البي نوقِّفه
    نقْلِب الأيام
    ضُلمَّة وليل
    ومادام فيها
    نِحنَ
    بِخير
    أو مُمْكِنْ نكُون
    بي خير
    مُمْكِن نِحنَ
    نبقى عُمَر
    نكُون خالد
    نكُون حيدر
    نسُوق الدنيا
    من ظُلماتَه للنور والسلام
    والبَرْ
    نقدَرْ .. ؟
    ولاَّ ماب نَقْدَر ؟
    كَدِْيْ النِتلمَّه
    باكر
    عِنْ سبيل الصافي
    نتفكَّر
    ونتفكّر نشوف
    هل نحن بي نقْدَر
    ولاَّ يقيف
    وسطنا البي يقول
    ..
    يا أخوانَّا ماب نقدَر
    كدي النتلمَّه
    باكر
    عن سبيل الصافي
    نتفكر ؟؟!
    avatar
    مرتضى خليفة

    عدد المساهمات : 175
    نقاط : 289
    تاريخ التسجيل : 11/05/2010

    رد: دفتر الأستاذ / وراق المجذوب

    مُساهمة  مرتضى خليفة في الإثنين 17 مايو 2010 - 6:12

    حييك الاخ زاهر على هذا الأختيار الجميل الموفق ونشد من ازرك وادعو كل الاخوة الاعضاء لقراءة هذه القصيدة اللوحة اكثر من مرة ..... ونحن فى انتظار المزيد يازاهر

    ايمن محمد عثمان

    عدد المساهمات : 73
    نقاط : 112
    تاريخ التسجيل : 04/06/2010

    رد: دفتر الأستاذ / وراق المجذوب

    مُساهمة  ايمن محمد عثمان في الإثنين 7 يونيو 2010 - 5:29

    يالله يابو الزهور ابداع بكل ما تعنيه هذه الكلمه .واختيار موفق مزيد من الابداع (كيف هان عليك القمر يرحل من عشيشك يترك الحن والولف ...كيف هان عليك البسمه من فاطرك تجف )اظنك فهتنى يا ابو الزهووووووووووووووووووووووووووووووووور

    غيم

    عدد المساهمات : 55
    نقاط : 64
    تاريخ التسجيل : 25/05/2010
    الموقع : بلاد الله الواسعه

    رد: دفتر الأستاذ / وراق المجذوب

    مُساهمة  غيم في الإثنين 7 يونيو 2010 - 6:18



    في حضرة الأستاذ القامة جلوس

    في صف السباتة الأول

    مستمتعة جدا أنا هنا

    ايمن محمد عثمان

    عدد المساهمات : 73
    نقاط : 112
    تاريخ التسجيل : 04/06/2010

    رد: دفتر الأستاذ / وراق المجذوب

    مُساهمة  ايمن محمد عثمان في الإثنين 7 يونيو 2010 - 7:37

    شويه شويه ياغيمه اجيكى اهديلى بسيمه .................... ماعظم التواضع فى شخص الغامااااااااااااامات
    لكى التحيه والتجلااااااااااااااااااااااااااااااااااااااا غيم بقدرحبك للبحر

    نصر الدين

    عدد المساهمات : 9
    نقاط : 11
    تاريخ التسجيل : 08/05/2010

    رد: دفتر الأستاذ / وراق المجذوب

    مُساهمة  نصر الدين في الإثنين 7 يونيو 2010 - 10:40

    الاخ .زاهر لك كل التحايا وأنت تجعلنا نهيم بين كلمات الرائع الاستاذ وراق وياريت تعرج لينا على الاخوين عوض التومى وعباس موسى ونريد من الاخ مرتضى أن يتحفنا من كلمات الوالد المربى الاستاذ الحاج الحسين
    avatar
    محمد مدنى سيداحمد

    عدد المساهمات : 87
    نقاط : 129
    تاريخ التسجيل : 23/05/2010

    رد: دفتر الأستاذ / وراق المجذوب

    مُساهمة  محمد مدنى سيداحمد في الثلاثاء 8 يونيو 2010 - 3:54

    انت رائع يازاهر ؛؛؛؛؛؛؛؛؛؛؛؛؛؛؛؛؛؛؛؛؛؛
    فانت هنا ؛؛؛؛؛؛؛؛؛؛؛؛؛؛؛؛؛؛؛؛؛؛؛
    كالندى المنساب على كل صفحات المنتدى فى روعـــــــــــــــــــــة وخيـــــــــــــــــــــــال له بريق ونكهه خاصة ؛؛؛؛؛؛؛؛؛؛؛؛؛؛؛ انت كل الجمال ؛؛؛؛؛؛؛؛؛؛؛؛؛؛؛؛؛؛؛ انت زاهـــــــــــــــــــــــــــــــــــر

    ومزيدا من الابداع
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / وراق المجذوب

    مُساهمة  زاهر سر الختم في الثلاثاء 8 يونيو 2010 - 14:55

    الي ...
    كل ...
    الذين ...

    شكلوا حضوراً أنيقا في حضرة وراق ...

    نتسلام سلام النسمة للمطر النزل دفاق

    وكيف هان عليك


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / وراق المجذوب

    مُساهمة  زاهر سر الختم في الثلاثاء 8 يونيو 2010 - 14:59

    كيف هان عليك


    كيف هان عليك .....
    القمري يرحل من عشيشك
    يقطع ألحن والولف
    كيف هان عليك
    الضحكة من فأطرك
    تجف
    كيف هان عليك
    قلبك يخف
    كيف هان عليك
    يا طـينة ألحن والصفا
    كيف هان عليك
    يا ساحــة الولف ألوفا
    كيف هان عليك
    يا فرحة الأوصال
    سكونه وهاتفه
    كيف هان عليك
    ترحل قماريك الوديعة
    موالفه
    وآ شري يا سرب القماري
    ولمتن
    وين طلــعتن
    وين نزلتن
    شوق الصدى الصامت
    حزين
    لي ضحكتن
    شوق الرميله عليها كانت قعـدتن
    وكان ســــر حديثن
    ولفتتن
    وكان همستن
    يا شوق .....
    يا شوق
    عليك هايف الضلوع
    يا حن
    وراك حابس الدمـــوع
    يا خطوة راحلة
    بلا شمــوع
    لم يا مغيرب
    سـامرن
    قنن لبينتك
    باشرن
    داعب هواهن
    وخاطرن
    لا تجبـــرن
    بس بقرن
    حالن نفوسن
    بصغرن ......
    يا قسمة الزين والعديل.....
    وآ شري
    كيف هان الرحــيل
    وآ شري
    يا قاسي القسي الفرقت ديل
    وآ شري
    يا عيني الترف
    كل ما المغيرب شمسو تتهادى
    وتميل
    وكل ما النجيمات
    يتبنن
    ساحة اللما
    وساعة الهديل
    وآ شري
    يا قاسي القسا
    وقاسي الوصول
    يا ليلي سـارة أحلامه
    داعبت الخيال
    رحلتبو لي ماضي السنين
    الكان نداها
    شذاها
    باقات الأمــل
    لحن البليب
    في أغصانا دغدغـت الفؤاد
    ردد يقول
    يا ليلي
    ليلك لا يطــول
    يا ليلى
    ليلك
    شايفــو ..
    شايف إشراقو
    طُول الوادي
    عرض الوادي
    بان
    فوق السهول
    من بينا فرّ
    وركّ
    فوق نغمة طنيبيراً حنين
    قالدلو زول
    ناغم سماواتا
    ً تجيب خبر المطـوِّل
    تاملو حول
    يا ليلي
    ليلك
    شايفو ..
    شايف إشراقو
    طول الوادي
    عرض الوادي
    بان
    فوق السهــــول
    جاينا من تالا الغرب
    نقارة
    حسها
    في شبابيل الودع
    ونقر الحجول
    جاينا من تالا الشرق
    دوبايا
    بكريها وتنيها
    تشاشي برق العتمة
    والسحب السيول
    جاينا من تالا الجنوب
    أبنوسه
    تنقز بين مزامير الشلك
    تنكع حمامات السلام لا فوق
    تطول
    يا غيمة وين
    يا غيمة أتبني ضلوعنا
    وين
    بِختا الضنين
    يا غيمة
    طال الشوق علي صابــر السنين
    يا غيمـــة
    من توتيل شربت كئوسه
    نخب العاشقين
    كيف هان عليك
    وقالوا البيشرب مرّة
    من توتيل
    برجِّعو ليْ الحنين
    يا غيمة
    لمي شتاتنا
    لمي سـواد عيونا
    علي الجفون
    يا غيمة
    قودي خطــانا
    لا تتمهلي
    الحيا في العيون
    هاتف الفؤاد
    ما ون
    وين قمريهو
    وين
    سمار نجيمات
    ضيهن
    صــابو الذبول
    والوحشة والنوي والنحول
    قمرينا وين
    برك..؟
    سمــــاك ..؟
    يا قمري
    أغصــــانك تهبهب
    مشتهاك
    اللوبي
    خضرة جرفو
    دايماً في لهاك
    الحلِّة غنوته
    من غناك
    أحزانا تبكي ورا
    بكـاك
    نجماته ضيّها
    من صفاك
    قمراته عاشقة
    من هواك
    يسعد مساها
    إسعــاد مساك
    كيف هان عليكن
    يا تويمات ألهنا
    يبقي العصير
    لملم خطيوات الحياة
    وقاد الشمس لي مـــأمنه
    وسكنت قبل كل العيون
    كل شــاردي
    عرفت حاضنه
    وهدأت شبابيل العصافير
    والمزامـــير والغنا
    وقاطعي الرميله الحنحنه
    ويبقي المغيرب
    جاب حريرتو.....
    خيوطه
    من كاحـل عيونكن
    لونه
    وبت الخضر
    مرقت حليلته فاضي
    ألا مقننه
    وحـــالتو اللبينى
    محيّنه
    وما أتمدت أيداً تتبنه
    وأنتن بعيد....
    شايلات معاكن
    كل بشرى
    وكل فرحة وكل عيد
    طابقـات هديمــاتكن
    بخت فالنا السعيد
    دافنات صرركن
    سر هوانا
    الساقي
    من صافي الوريد
    وآ شري
    وآ لهفتنا
    وآ شوق العيـــون
    لي ضمكن
    قومن تعالن
    لي عفو ..ورضا أمكن
    شايلي الخـواطر
    همكن
    هاتف القلوب
    فوق نمكن
    ريحةَ الأحاسيس
    شمكن
    طعم المشاعـر
    لمكن
    راجنكن .....
    راجنكن .....
    ما شال بريق فتق السماء
    راجنكن .....
    ما حن طنبور لي وترتو
    وناغمـــا
    راجنكن .....
    ما طاف سعد بيناتنا
    شايل الأوسمة
    راجنكن .....
    عيد الحياة وعيد اللمـــا
    راجنكن .....
    والخاتمة راجنكن والخــــــــــــاتمة
    راجنكن .....
    والخاتمة
    راجنكن
    والخــــــــــــاتمة


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته

    خالد كمال الدين

    عدد المساهمات : 6
    نقاط : 14
    تاريخ التسجيل : 18/06/2010

    رد: دفتر الأستاذ / وراق المجذوب

    مُساهمة  خالد كمال الدين في السبت 19 يونيو 2010 - 2:57

    التحية تزجى باريج الورد وريحة الجروف للاستاذ وراق المجزوب له التحية والتجلا اينما حلا ...........ثم تمتد التبريكات والتهانى بعمق واصالة النيل لاخى وحبيبى زاهر سر الختم متعه الله بالصحة والعافية وهو يتحفنا ويطربنا بهذا الفن الاصيل الرائح كروعة اعضاء هذا المنتدى
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / وراق المجذوب

    مُساهمة  زاهر سر الختم في الثلاثاء 22 يونيو 2010 - 17:57

    أخي / خالد كمال
    والله سعدت سعادة كبيرة خالص خالص بحضورك الرائع وانضمامك الينا وإن كنت أعذرك علي التاخير ... أرجو وكما عودتنا يجيد النم علي أريحية جلسات الكاسنجر ... فالمنتدي يحتاج منك نزف علي خدر حبيبتي الكاسنجر

    ولك التحية وانت تعطر دفتر الرائع / وراق المجذوب بهذه الاطلالة والمتابعة ... وعلمي انك تجيد التصفح في دفتر وراق أكثر مني لذا اتوقع مساهماتك ...

    وغني عشقك يا صبية
    نحن قدامك مدارق
    غني للوطن المفارق
    عشتي يا وطني
    المبرق بالندي
    ولون المشارق


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    يالغابيكا شوف العين

    مُساهمة  زاهر سر الختم في السبت 3 يوليو 2010 - 15:29

    [center]يالغابيكا شوف العين
    ــــــــــــــــــــــــ

    يا مسكين
    وحــات الله
    وكتـاب الدين
    وحـات سيد مكَّـة
    والحرمين
    في بلدي الغريب
    في شأن
    نقدملو التحيــة
    آمان
    وبين بكنـاتنا نديي بكـان
    ويلقى كــرم بـلادي
    ألوان
    عنــدي الرحمة
    والإحسان
    عنـدي التقوى
    والأيمان
    وعنـدي شرافة القرآن
    في بلـدي السلام
    مردود
    في بلدي القدح
    ممدود
    في بلـدي الضهر
    مسنود
    فيها الأبيض
    الممدود
    فيهــا الأزرق
    المشدود
    فيهــا الأتبراوى
    يجود
    فيهـا القاش وخور بركة
    وخـور ستيت
    والدندر
    وفيهـا زراف
    وفيها غزال
    ومن ملكال ولا عِن نمولى
    كلهـا ديك
    رعود ورهود
    وفى بلـدي العيون
    السود
    وفى بلدي الجمال
    مريود
    وفى بلدي الشعر
    منشود
    وفى بلـدي الوتر
    مشدود
    وألفى بلـدي كلو
    أجواد
    ضراعـو الوافر الكداد
    ترابو عطـاها
    غير ميعاد
    وفى بلدي الحصــاد
    أعياد
    مطامير بلـدي قبلة زاد
    وفى بلـدي الزلال
    فراع
    في بلـدي السحاب
    تراع
    بلدي جروف قرير و وساع
    حواشات بلاد
    وضياع
    في بلــدي القصن
    ميَّاع
    في بلدي الصبيط
    فداع
    وفى بلـدي الزرع
    مشاع
    أظـــنك لا سمع
    بالقربة
    لا عنــدك خبر سنار
    ولا دقش الجنيــد
    سمعك
    من الخرطـوم
    هو كم أمتار
    ولا عســـلاية لا ملوط
    كنانة آلفي ضــرا المشوار
    وأصبــح للجزيرة
    أتراب
    بعد ناس حلفـــــا
    والزيداب
    وأن قت ما سمع
    كضــاب
    ناس كلى والرهـــد
    وسليم
    عراضة الدالي
    والمزمــوم
    نعامة والخِوَيْ وفوق لــــــــــوم
    فواكه مرّة في الخرطــــــــــوم
    في بلــــــــــــدي القطن مفتول
    الزره والقمــــــــــــــح محصول
    والسمسم وأرادب الفـــــــــــــول
    عامرى جنــــــــــاينو بالمشتول
    في نوري السبيط مسلـــــــــــول
    وفى الباوقه الفرع مجـــــــــدول
    وسبيل للقاشى غابات شــــــــول
    ووكت الوحــــــــــــــــــدة تتدفق
    جداول أبو جابـــــــــــرة تتروق
    أنت القلت أيش عنـــــــــــــــدك
    رغم أنفك بتلقي العنــــــــــــدى
    لا بتحلمبو لا عنــــــــــــــــــدك
    وتعرف وكتو أنــــي تقيل
    وأصــــــــــــــــــــــــــلى تقيل
    مسنود الضـــــــــــــهر والحيل
    عندي رجــــــال وعندي الخيل
    عندي العـــــــــــاج وسن الفيل
    وعندي زراف وجـــــدي الريل
    وعندي مواشي عنـــــــــدي البل
    ورود من ضحاها ولا أواخر الليل
    وعنــــــــــــــــــــــــــــــدي أبوات
    وعنـــــــــــــــــــــــــــــــدي أمات
    وعنــــــــــــــــــــــــــــدي أخوات
    وعنــــــــــــــــــــــــــــدي أخوان
    عزيمـــــــــــــــة شهامة الفرسان
    خيولن ديمــــــــــــــة في الميدان
    عرقان الجبين نديـــــــــــــــــــان
    عشان ناس عازه والســـــــــودان
    وعنـــــــــــــــــــــــــــــدى حسان
    خصالن دولة الإنســـــــــــــــــان
    عيونن في بــــــــــــــلادي أوزان
    حديثن مطرب الألحــــــــــــــــان
    تلاقى الليــــــــــــــل على أهدابن
    ويلالى النـــــــــور على اللأوجان
    عــــــــــــــود نديان وريق رويان
    ويتمايل فريـــــــــــــــــــــع ألبان
    وكل القلتو ليــــــــــــك يا أخوى
    خلو بعيــــــــــــــــد وخلو لهوى
    بس يكفى أنو عنـــــــــــدي النيل
    وعندي سحـــــــــاب بروقو تشيل
    وحمـــــــــــــــــــــــــــــــلو تقيل
    يخدرو عنــــــــــــدي مليون ميل
    عزيزة بــــــــــلادي جمل الشيل
    يالغاببيــــــــــــــــــك شوف العين
    تعال شوف بلــــــــــــــــــــــــدي
    عندها أ يش وحــــــــــــدها و ين
    وكــــــــم كــــــــم ما أنذكر للحين
    يا مسكين .......
    وحــــــــــــــــات الله وكتاب الدين
    وحـــــــــــات سيد مكة والحرمين
    في بلــــــــــــدي الغريب في شأن
    نقدملــــــــــــــــــــــو التحية آمان
    وبين بكناتنا نـــــــــــــــدى بكان
    ويلقى كرم بــــــــــــــلادي ألوان


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته

    وداسماعيل

    عدد المساهمات : 3
    نقاط : 5
    تاريخ التسجيل : 21/07/2010
    العمر : 38
    الموقع : مروى

    رد: دفتر الأستاذ / وراق المجذوب

    مُساهمة  وداسماعيل في الأربعاء 21 يوليو 2010 - 10:05

    راااااااااااااااااااااااااااااااااااااااااااااااااااااااااااااا
    اااااااااااااااااااااااااااااااااااااااااااااااااااااااااااااااااااااااااا
    ااااااااااااااااااااااااااااااااااااااااااااااااااااااااااااااااااااااااااااا
    ااااااااااااااااااااااااااااااااااااااااااااااااااااااااااااااااااااااااااااا
    ااااااااااااااااااااااااااااااااااااااااااااااااااااااااااااااااااااااااااااااااا
    اااااااااااااااااااااااااااااااااااااااااااااااااااااااااااااااااااااااااااااااااااا
    ااااااااااااااااااااااااااااااااااااااااااااااااااااااااااااااااااااااااااااااااااااااا
    اااااااااااااااااااااااااااااااااااااااااااااااااااااااااااااااااااااااااااااااااااااااااا
    ااااااااااااااااااااااااااااااااااااااااااااااااااااااااااااااااااااااااااااااااااااااااااااااا
    اااااااااااااااااااااااااااااااااائع
    [center]


    عدل سابقا من قبل وداسماعيل في الأربعاء 21 يوليو 2010 - 10:12 عدل 1 مرات (السبب : طول الرسالة)
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / وراق المجذوب

    مُساهمة  زاهر سر الختم في الأحد 26 سبتمبر 2010 - 14:35

    هوية سودان أبريل
    ــــــــــــــــــــــ
    صبر التربال الفتلو حبال
    العاول تمرو سنين
    ما شال
    المترة السدد عينة
    حجر
    قيزان الرملة الواقفي جبال
    كبدك يا حن
    الريف الكان دفاق الشوق
    ما نادى الراحل قالُّو ..
    تعال
    الطير الجابو المغرب
    صاد
    ما جاب لي عشو سترةَ الحال
    الصيف الكدّب
    في التقند
    متكِّن فوق نفَس الآمال
    الحسرة ألفي جوف
    البروِد
    لا جدول سال
    لا برقاً شال
    النحس الحلّق ستاعشر
    ستا عشر عام
    عاس فيها وكال
    الشوم الصال في الدارة
    نقز
    حارساهو كلاب
    أنيابه طوال
    العشم إتلاك
    البلعو .. سكت
    قصَّاص الدرب
    أيديهو ختت
    الخبرا التقرو النوق قبلو
    لا عادو و لا إبلن
    عدت
    اللقمة قست
    بلالةّ الريق
    الجقمة بقت
    معروض الضيف
    الجابو نهار
    ذكر الصلاح ..
    وين حضار و ؟؟
    ..
    ليل المداح
    بارد طارو
    ..
    الشيخ الفاتح دارو
    ضحى
    الحيران ما عمَّرو
    نارو
    الملك السنَّد شَتَمُو
    ونقَرُو
    الناس ما أتلمو وما دارو
    ..
    ما دوبا لبيب
    لي فاطني السمحى
    إتلاقن في النغم أوتارو
    ..
    لا جابو الشوق
    ود الحطَاب في الدارة
    وبشر فرارو
    ..
    الحياة نكّست الراية
    نهار
    النار ماتت من دار ..
    لي دار
    أتفشى الجوع
    أتفشى العطش
    آ وادي الخير العار العار
    أتفشى المرض أكل الأكتاف
    مطمورة زاد العالم
    كلت
    والدولار بشّر في الساحة
    ولا فوق طار
    ..
    افترت الطغمة الحاكمة
    وبطشت
    عصابة مايو الجلدن
    فصلت
    قتلت أشراف
    سجنت آلاف
    الكانو صغار
    الطيف العدّ
    غشاهم ليل ما عدَّ نهار
    ما ركبو الخيل
    الخيل آب تدى ضهوره
    أشرار
    ما كان في إيدن غير العجز
    الكار
    اللملم كل الكار
    العاثوا فساد
    الحرقوك يا وطن الأحرار
    باعوكَ رماد
    للأمن القومي الحقبك ....
    في أكياس الذل
    ما كان ده
    مزاد
    أباحو كرامة شعبك...
    يا وطن الأمجاد
    والسر في أنك يا سودان ...
    لا بترضي الذلَّة
    ولاب تتهان
    صحوة شعبك كانت بركان
    من بطن الريف
    من كل مدينة
    وكل شبر
    من كل مكان
    عايد
    يا وطن الحرية
    عايد
    صبراً حصدو التربال
    مسرة حواشات مروية
    عايد
    لحناً غناهو خليل
    فرحتبو شمال الوادي
    كنوز
    رقصتلو جنوب الوادي
    طرَب
    نمولي
    وشاشتلو الزاندية
    عايد
    غرة أم خيراً بره
    رهيد البردي
    النفس الحرة
    اتنسم عفرة صعيدية
    عايد
    طوكر نفّاض المحل
    الليهو القاش
    لمّا روافدو
    ودوبت عربان الشكرية
    ..
    عايد
    فكراً يبني ويزرع
    من واقع حالنا النطرية
    عايد
    منبر يطرح ويسمع
    للمليون ميل
    ألف قضية
    وأول مطلب للمليون ميل
    تكتب في صفحات الأمجاد
    لي سودان العزة
    هوية
    عاشت رايات الحرية
    تحيا شعارات الوطنية
    عاش السودان
    شعب السودان
    رافع رايات الحرية


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / وراق المجذوب

    مُساهمة  زاهر سر الختم في الأحد 26 سبتمبر 2010 - 14:41

    يبقى الوصـال
    ــــــــــــــــــ
    لا قيتا
    وأتمنِّيت أكون
    جوَّاها
    صُرَّتي من قرون
    ...
    صافيتا
    وأتماديت جنون
    غَنِّيتا
    مشحون بالفنون
    ...
    نقّْيت خواطري
    من الظنون
    وبقيتا مرهون الشجون
    ...
    نِعمَ العجَب ..
    زينة البلاد ..
    كسلا
    المعزة ألماب تهون
    اتمكَّنت جُوّ ه الفؤاد
    بِقَت التراتيل
    واللحون
    ...
    نِعمَ العجَب
    عجب النفوس النايرة
    طِيبَة ..
    صفا قلِبْ
    عجب الوجوه الهاشَّة
    باشَّة
    كما تحِب
    ..
    عجب السواقي الخَضْرَة
    لا طرَفْ الدرب
    ..
    عجب الجناين العامري
    بالغصنَ الرطب
    ..
    عجب القطوف
    الدانية
    ببي ما تشتهي الأنفس
    قِرِب
    عَجَب الخيال
    الفي ظلال الدهشة
    في واديك
    ضِهِبْ
    ...
    دُوم يا هَناء ...
    فوق كسلا
    فوق أرض الضفاف
    والخضرة
    زايرَه ..ساكِنَه
    ..
    فوق زينةْ الشرق
    البقِت فوق صدرُو
    ناهدة مفاتنَه
    ..
    فوق صحوة الوجهَ الحسُن
    بارد الحشا
    وفال المنى
    فوق منحدَر واديها
    وين
    ما لمّ حادي روافدو
    وين
    ما شاف عَنا
    ..
    وين ما طمح
    وين ما سرَح
    وين ما نقَح وبارى التقاند
    وتكَّنَه
    وبرِّد خُطاك بين الجبال
    روِّح دواخلك
    وأفتنَه
    ..
    شَمْ خَوْخَتْ ... برَّاق برَق ...
    فلاَّخ مساديرك
    رنا
    ..
    دُوب ليها
    "صُفْراً دِرْعَتِن"
    ودوب ليهو
    مزمار البطانة وشادنَه
    ...
    وين يا أمير
    كان ليك وزير
    أو ليك مجير
    عابر سبيل ..
    جيتك أنا
    ...
    ناجيتا
    في واديك هواي
    داعبتَ إحساس
    الغُنا
    ..
    من لحنو
    من خلجاتو
    من همساتو
    أو من دندنَة
    ..
    كان ألقى روحي
    مشاعرَه
    وارتاح ..
    أسامر باطنَه
    ..
    جوّايا تايهبُو الهوى
    جاي جاي
    وجاي هدَّايُو ضال
    يمسح خطيواتُو
    القبيل
    كانت مَتاتيها الشمال
    لُولايا كان بين الجروف
    فُوسِْيبَا
    والطين والرمال
    هَدهادَه
    كان صوت السواقي
    الحالْمَة
    والنخل الظلال
    قول يا هوى
    وين
    يا زمان كيف
    يا عِشِق
    نَفَض المحال
    واتبرَّا من خاطر جفا
    وجوَّه الفؤاد نسَج الوصال
    ومن جُوَّا هبهَب
    فرَّ ..حلَّق
    فوق سماوات الصَفا
    وهطلت غيومو
    علي التلال
    وجات فوق قوادمَ النسمة
    دافي ..
    وعافي
    كحَّلت العيون
    بارْدَ الدلال
    وتبَنَت كَبِدْ كل جارْحَة
    في الحلّة
    وبِقَت بين الضلوع
    ليها إرتحال
    ..
    ما كان خيالي
    يساورُو خاطِر
    يوم يلاقي
    بلاك عشُوق
    ..
    يقسِم غناوي الشوق
    تكون رحَّالَه
    هايمَة شمال .. شروق
    ..
    أنفاسو تتقطَّع ورا مسدار
    تشاشِيلُو البروق
    تخترِبُو فوق أطلال
    محلَّق ..عزةّ
    يا تاجوجو ... شوق
    فوق قلعة
    "الحارْدَلُو"
    بين نالُو وظباهو
    عليها كان
    فوق نَمُّو يتمايل يتوق
    ..
    نفّض خريفو مَحَل بلاد
    "هاش مهشَشِيب الدِرَّة
    والباشندي
    بين بيَّا وبَلُوس
    رقع الفتوق
    لاقاها بت المِن قرين
    الكَرَّة فوق كَارتُوت تَحِن"
    معشوقة لاقت عاشقه
    وأنا يا ظنون
    ساورْني
    ما ساورني طيف
    ساورني حِسْ ومصادقَة
    بين جاي وجاي
    ترحال وود
    ويبقى التشوُّق واللقا
    نفحات ولوحتَه في العيون
    إحساسَه في الخاطر
    بقى
    ياسمينة عطَّرت الفؤاد
    ومشاعرو صامتة ناطِقَة
    مَرَقَت علِْي فال الفرح
    هاجِرْ بشايرو
    وبارِقة
    هاجِر قدَم خير والسرور
    آمال وديعة
    مجرتَقَة
    هاجر حكايات الزمن
    هاجر بِلِيب غُصنَ النقا
    ألحانو .. أنغامو الطروبة
    الدافية دفء مشارقَة
    ويبقي الوصال
    يا كسلا
    هاجر سيرة عَطِرَة
    وشيِّقة
    وتبقي الأحاسيس
    ما لِقَت
    وتبقى المشاعر
    ما بِقَت
    كسلا
    الرَواح وزوارقَه
    والبهجة هاجر دافقة
    ويبقي الوصال
    يبقي الوصال
    يا كسلا
    زينة مشْرِقَه
    ما أمتدّ في الأيام عُمُرْ
    ما عشتُو
    ومضة وخافقة
    ...
    يبقى الوصال
    ...
    يبقى الوصال
    ...
    يبقي الوصال
    يبقى
    اللِقا


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته
    avatar
    مرتضى خليفة

    عدد المساهمات : 175
    نقاط : 289
    تاريخ التسجيل : 11/05/2010

    رد: دفتر الأستاذ / وراق المجذوب

    مُساهمة  مرتضى خليفة في الإثنين 27 سبتمبر 2010 - 8:59

    شَمْ خَوْخَتْ ... برَّاق برَق ...
    فلاَّخ مساديرك
    رنا
    ..
    دُوب ليها
    "صُفْراً دِرْعَتِن"
    ودوب ليهو
    مزمار البطانة وشادنَه

    كلام يازاهر
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / وراق المجذوب

    مُساهمة  زاهر سر الختم في الثلاثاء 28 سبتمبر 2010 - 14:43

    الاجمل من ذلك يا مرتضي شرح الاستاذ وراق لهذا المقطع ... بعد كلام كتير تطلع برضو ما فاهم حاجة والاسئلة العندك ذادت كمان
    من اورع الاوقات عندي طباعة ديوان وراق وما كان يدور من مناقشات واتمني لو يعيد وراق طباعته مرة ثانية

    شكراً مرتضي وتحياتي


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته

      الوقت/التاريخ الآن هو الخميس 23 نوفمبر 2017 - 21:06