منتديــــات الكاسنجــــــــــــــــــــــــــــــــــــــــــــر

أهلاً وسهلاً بك في منتديات الكاسنجر
عزيزي الزائر الكريم .. زيارتك شرف لنافي المنتدي ، ولكننا نطمع في تسجيلك معنا

للتواصل بين ابناء الكاسنجر بالداخل والخارج وكل الراغبين


    الرجعه كيف؟

    شاطر
    avatar
    صلاح الحاج

    عدد المساهمات : 73
    نقاط : 137
    تاريخ التسجيل : 10/05/2010

    الرجعه كيف؟

    مُساهمة  صلاح الحاج في السبت 15 مايو 2010 - 3:34

    خالد شقوري

    يا الشايل شمسك في جواك خليها تبين للناس تطلع
    يا النازع فرحة والدة هناك غير حس آهاتك ما بتسمع
    ******
    يا الناسي اللبقة المفتوحة دي بلاك طوريتك ما بتقرع
    المنجل في راس التمرة ناسيهو وامك ما بتطلع
    الكتقة وقعت والحملان في اللوبي بقت تجري وترتع
    والزير الفي بيت الضيفان حرمان لا نزّ ولا نقع
    ******
    يا السبت عقابك وروحت وحيات عز بلدك لا تنجع
    الشتلة تقولك لاتنجع الواطة تقولك لا تنجع
    الحوض الما رفعت سرابو ينادي يقولك لا تنجع
    الحبل الما تميت وسيرو يهاتي يقولك لا تنجع
    والنيل الفي واطاتنا ترع بيقولك ازرع ولا تنجع
    ******
    ماك فاكر يوم داير ترحل وابوك الحاج شايلو عصا
    لا حيلو وقف طقش الابريق اندفق سال فوق المصلاة
    قام بارى الحيطة واتوكل ويقوم فد مرة ومية يقع
    ويقولك يا المبروك ارجع
    ******
    ارجع ارجع يا زول ارجع غير ارضك عاد ما بتلقى بطاح
    شن داير في بلدا والناس ما فيهن حاس وما فيها صباح
    الليل الويل مليان اتراح الويل الليل مليان اتراح
    بياع بيقول افراح افراح زي البيقول تفاح تفاح
    ******
    مجلوبة الفرحة ومفروشة من ضحك الناس دايرين ارباح
    لو كان في ايدن ملك الكون كان لمّو عبير الزهر الفاح
    كان علمو نفس الزول العاش في سدر الليل داير يرتاح
    كان حجزوا الغيم في واطاتو وكان آمسكين باعو الارواح
    ******
    وين تلقى الفرحة وتتهنى في دارا ضيقي ومافي براح
    جم ناسا من عين العطشان تخطف ومضات البرق اللاح
    ******
    سايب اهلك ونخلك راحل قول وين ماشي وين آ صاح
    الشمس النايري ابت تطلع النيل يا زول اصبح رحراح
    الضل قصر ما غتى رويس ولدا ساكب عرق الكتاح
    الواطة ابت تديك الخير ولا انت عليك ما هابي رياح
    ******
    قولي وين ماشي ووين غاشي ولي شن سايب بلد الصلاح
    النسمة ان جاتك بتجيك ملياني عبير عند الفياح
    الموية ان داير تلقاها نقاعا واطيب من الراح
    ان درت نغيم الموج تلقى وان درت كمان الطير صداح
    ******
    ارجع ارجع يا زول ارجع
    الضحكة هناك من جوة الجوف الفرحة هناك ما فيها الخوف
    الشقى ارحم في ضل النيم وبعيد من ناسا واقفة صفوف
    جم ناس حبان تلقى المكسور مشيول في كتاف واحد مكفوف
    الجن الاحمر فاقد الحيل في خلوة حاج الخير مكتوف
    دكان الشيخ فوق الواطة كيمان كيمان ما فيهو رفوف
    avatar
    Admin
    Admin

    عدد المساهمات : 51
    نقاط : 96
    تاريخ التسجيل : 26/04/2010
    العمر : 39
    الموقع : امدرمان-امبده-ح27-منزل 327

    رد: الرجعه كيف؟

    مُساهمة  Admin في الإثنين 17 مايو 2010 - 4:38

    ارجع ارجع يا زول ارجع
    الضحكة هناك من جوه الجوف الفرحه هناك ما فيها الخوف
    تشكر يا صلاح نتمنى ان نفرح بيك قريبا واكيد الفرحة فى الكاسنجر ما عندها ثمن ...
    avatar
    مرتضى خليفة

    عدد المساهمات : 175
    نقاط : 289
    تاريخ التسجيل : 11/05/2010

    رد: الرجعه كيف؟

    مُساهمة  مرتضى خليفة في الإثنين 17 مايو 2010 - 6:16

    القصيدة جميلة ياشنكور لكن اسمها لاتنجع وليس الرجعة كيف
    avatar
    صلاح الحاج

    عدد المساهمات : 73
    نقاط : 137
    تاريخ التسجيل : 10/05/2010

    رد: الرجعه كيف؟

    مُساهمة  صلاح الحاج في الثلاثاء 18 مايو 2010 - 5:04

    حكاية الشافعة

    كيـفـن أصـبــر قلـيـبـى.. وكـيـفـن أعـمــل حـسـابـى
    مـا دام عشمـى فـى نظـرة .. والعنـدو النظـرة مابـى
    بجرو غنايا أحكى ليكم .. تعالو أسمعوا يـا صحابـى
    حكايـة الشافعـى البريـدا .. وريــدا شقـايـا وعـذابـى
    أحـن لهـا حـن القـمـارى .. تقوقيـبـا أوتــار ربـابـى
    واهوى الهوى فى هواها .. وهواها قرايتـى وكتابـى
    منـو الـقـال ليـكـم عقـلـتَّ .. وحاتـكـم جنـيـت دابــى
    بقيـت لمـان ليهـا أفـارق .. أفـارق عقلـى وصـوابـى
    أضيق لمتين ليها أرجع .. أخاف مايطول بى غيابى
    أعاين زين فيها وأشبع وأزيد إعجاب على إعجابـى
    أشـرِّق ويـن مـا أغـرِّب .. وأشيـل هـمـى وإكتئـابـى
    محل ما أمشى ألاقى طيفاً.. مشتت فكـرى وحجابـى
    تطير روحى بعيد تغـازل.. خـدودك زهـر الروابـى
    تتعلـق بيـن عيـونـا .. ورمـوشـا الـبـى فـوقـا كـابـى
    قليبـى يفـارق ضلوعـى .. يـلاهـى عليـهـا ويشـابـى
    بعـيـد مابيـقـدر يـقـاوم.. بـريـق البـسـمـة السـحـابـى
    صديـرن لمـا يتفـرَّ .. تبـق نــار الله فــى أعصـابـى
    وقديلتن كيتن علـى .. وا نشـاف ريقـى وخـم ترابـى
    حنينـى ومـرات بتقسـى .. تقـول فـى نفسهـا اتغـابـى
    إتغابى العرفـة فيهـو .. وا زرف دمعـى ووا خرابـى
    صحيح أصبحت مملوكا .. أسـوِّى أورادى وأزنابـى
    متـل مـا ملكـت فـؤادى .. أنـا ملـك شيطـان الكتابـى
    أخاف مـا بقـدر أعاتـب .. أقـول تزعـل مـن عتابـى
    أموت أحسن من هى تزعل .. أو تزرف دمعة كابى
    عشانا أنـا كـم ضُقْـتَّ مُـرَّة .. عشانـا مهمِّـل عقابـى
    عرفت الله فى عذابك .. إنـتَّ خـاف الله فـى شبابـى
    avatar
    صلاح الحاج

    عدد المساهمات : 73
    نقاط : 137
    تاريخ التسجيل : 10/05/2010

    رد: الرجعه كيف؟

    مُساهمة  صلاح الحاج في الأربعاء 19 مايو 2010 - 4:56

    محمد النصري
    مـا تظــن انـا بـي وراك ابـقـي زي عـصـفـور كـســيــر
    ما ظني ابقي بين صمتي وهواي طول زماني اسير اثير
    اللي مـهــد لـيــك طـريــق لـســه قـلــبـك كــان كـبــــيـر
    بكــره يـديــنـي الامــان ابـقـي فـي الـســمـــوات اطـيــر
    ما اظني
    الـطـــريـــــــق السـبـتـو لي وقـبـل مـــا نوصــل نهـايتو
    تـقــدر الـخـطــوات تـواصـلـوا حـتـي لـو تـرجــع بدايتو
    الهـــوى الشــايــلاه الـدواخـــل صاحي ما بتكمل روايتو
    فــوق اعـــالــي الــــروح ترفرف بالاماني الحلوه رايتو
    ما اظني
    انـتــا لـو فـــاكــر الـمــشــاعـر تبكي يوم تغشـانا ذكري
    الـحــظ الـمــشـــــدود وانـــــــــادي كـلـمـا اقـراك واقرا
    الـقـــلـيـب الـضــو دربـــك وخـتـــه فـي جـــواك ذكـرى
    بـكـــره يـــزرع ورده تــاني وحـــولـه تـكـبــر الف زهره
    ما اظني
    لا تـظـــــن بالــسـاهــل انـسـي وابـقــي زيـك سكة تاني
    الـمـشــاعــر مـهـمـــا تـقــسي ومهـما من الـريـد نعاني
    مــافـي زول بـيــن يــــــــوم وليله بـيـدفن الكانت اماني
    إلا مــا بـفـضــل اشيــلك طــــول حــياتي وهــم واغاني
    ما اظني
    avatar
    صلاح الحاج

    عدد المساهمات : 73
    نقاط : 137
    تاريخ التسجيل : 10/05/2010

    رد: الرجعه كيف؟

    مُساهمة  صلاح الحاج في السبت 22 مايو 2010 - 5:17

    لـسـه قـادر تـانـى اصـبـر مـهـمـا مـنـى بعد سرابك
    لـسـه قـادر قـلـبـى يـنـزف كـلـمـا طـعــنــت حرابك
    لـسـه قـادر عـمـرى يكمل بـرضى واقف فيهو بابك
    إلا مـا بـقـدر وحـاتـك لـحـظة اتحمل غيابك يا منايا
    ***
    في إنتظاري عـلـى رصـيـفـك والزمن ما حّن جابك
    يـا وجـع روحـى البتمـرق فى تماس برقي وسحابك
    لي زمـن ودران وتـايـه قــاربـي ضايع فـى عبابك
    ومن مـراسـيـك يـا حـبـيـبـه إنسدل تـالاى حجابك
    ***
    مـهـما جـارت بـي ظـروفى أو على ضاقت رحابك
    وعـشـتـا فـى هـامـش حـيـاتـك لا حـسـابك لا عتابك
    يـانـى فـارش دربـك اخـضر فى إنتظار هيبة جنابك
    تـلـقـى فـوق صـفـحـة جـبـيـنى الف مرحب بيك حبابك
    ***
    يـا عــشــق فــيـــنـا اكـبــر مـن مـشـيـك ومـن إيابك
    يا عشم فى سماى ازهر واصلوا مـزروع فى ترابك
    يا وجـع قـلـبـى الـمـودر ذاتـى كـلـمـا فـكــرى سابك
    ويـن ادس حـزنى الـبـتـاوق فـيـنى فـى همسة ربابك
    ***
    آه انـا الـقـابـلان انـزل فـرحـى كـلــو واشـيـل عذابك
    آه انـا الـنـازر حـيـاتى روحـى عـمــرى وكـلى دابك
    آه انـا الــضــيـعــتـا ذاتـي وراجـى اتـعــوض شبابك
    قـلبي يهـتـف ... دقه ... دقه
    avatar
    صلاح الحاج

    عدد المساهمات : 73
    نقاط : 137
    تاريخ التسجيل : 10/05/2010

    رد: الرجعه كيف؟

    مُساهمة  صلاح الحاج في السبت 22 مايو 2010 - 5:21

    ودقه مرحبتين حبابك( ليك انتى)
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: الرجعه كيف؟

    مُساهمة  زاهر سر الختم في الثلاثاء 25 مايو 2010 - 2:23

    ( ليك انتي )

    يا صلاح إن كان غلبك الصبر أصبر شويه
    لك التحية وربنا يوصل علي الخير
    وعلي العافي
    دمت طيب ... وسلامات
    avatar
    صلاح الحاج

    عدد المساهمات : 73
    نقاط : 137
    تاريخ التسجيل : 10/05/2010

    رد: الرجعه كيف؟

    مُساهمة  صلاح الحاج في الثلاثاء 1 يونيو 2010 - 7:06

    والله لو تسأل على أنا حالى بعدك حال عِداك
    دنيايا ما زارها الصباح والنوم جفانى رحل معاك
    وزمانى اقولو كفاى هموم يرجعلى تانى يقولى هاك
    ياهو المقدر ياحبيب والدنيا مابتديك رضاك
    ***
    أنا غايتو ناذر حبى ليك لا يحب ولا يعشق بلاك
    حتى إنبقيت بالحب ودِر وشارف على درب الهلاك
    ما دام سعادتى بشوفا فيك .. ما دام حياتى بقت هواك
    فى الدنيا أحبك للممات وفى الآخرة برضى كمان معاك
    avatar
    الصادق حسن خليفة

    عدد المساهمات : 33
    نقاط : 41
    تاريخ التسجيل : 03/07/2010
    الموقع : الخرطوم

    رد

    مُساهمة  الصادق حسن خليفة في الخميس 5 أغسطس 2010 - 3:54

    التحية لك اخونا العريس صلاح شنكور علي هذا الاباحر في دنيا الطرب والطمبور
    ودايرين الزيادي لسع يا صلاح
    باقي الايام دي نحنا عطشانين تب،،،،،،،،،
    يا ابو صلاح عليك الله لو عندك من عيسي ابروي ادو هبشة شوية ؟؟؟؟

    دندنه ":
    عشان عارف الناس رايدنك ،،،،، فوق الاشواق راجنك
    مابيرضو غيابن عنك ،،،،، اليوم بيشوفو كتير
    avatar
    عبدو الشيخ

    عدد المساهمات : 380
    نقاط : 594
    تاريخ التسجيل : 25/05/2010
    العمر : 37

    رد: الرجعه كيف؟

    مُساهمة  عبدو الشيخ في الخميس 5 أغسطس 2010 - 4:51


    (( واهوى الهوى فى هواها .. وهواها قرايتـى وكتابـى ))
    والله يا صلاح ود أبنعوف كان يصفحو منو عشرين شاعر , كلام عجيب
    قال أهوى الهوى فى هواها جناس تام وقوة فى البلاغة رجل يهوى هواء الله فى حبها أى هواها وحبها ذاتو هو المنقذ لقرايتو وكتابتو , فهذا المشهد عميق يستحق مننا الاشاده .

      الوقت/التاريخ الآن هو الثلاثاء 12 ديسمبر 2017 - 20:42