منتديــــات الكاسنجــــــــــــــــــــــــــــــــــــــــــــر

أهلاً وسهلاً بك في منتديات الكاسنجر
عزيزي الزائر الكريم .. زيارتك شرف لنافي المنتدي ، ولكننا نطمع في تسجيلك معنا

للتواصل بين ابناء الكاسنجر بالداخل والخارج وكل الراغبين


    راس السنة

    شاطر
    avatar
    صلاح الحاج

    عدد المساهمات : 73
    نقاط : 137
    تاريخ التسجيل : 10/05/2010

    راس السنة

    مُساهمة  صلاح الحاج في الخميس 26 أغسطس 2010 - 7:44

    تسالنى كيف راس السنه وانا بى هنا

    مليان شقا وشرقان ضنا
    يابختك انت هناك سعيد متهنى بالعام الجديد
    كلك فرح ودايب غنا
    وتسالنى كيف راس السنه
    حليل بلدنا وياحليل كل الجميلات والفرح
    وبلدنا بى رغم الظروف القاسيه والهم الطفح
    ما فيش بلادآ تشبها ولا غير سماها كنار صدح
    كل حاجه ليها طعم هناك حتى الحزن زى المرح
    وحناننا ما زى كل حنان ولا ناسنا زى الناس هنا
    وتسالنى كيف راس السنه
    انا لى زمن ما حضرت عيد فى وطننا وله فرحته يوم
    يوماتى شايلنى الاسى ويدينى بعدو كمان هموم
    الليل يمر زى حول هنا القاهو من اصحى واقوم
    وكتير ليالى تعدى بى من دون عيونى يجيها نوم
    واهو ديه حال كل زول غريب الرجعه ليهو تكون منى
    وتسالنى كيف راس السنه
    هنا لا فرح ولا عيد بيجى ولا بنعرف مروا كيف
    كل الاماسى زى الصباح وحتى الربيع زى كل صيف
    من عمرنا بيمضى الزمن وايامنا ماشه على خريف
    وعيوننا جافاها النظر وحتى القليب قرب يقيف
    والشوق خلاص كمل دموعنا واقدارنا مابيه تلمنا
    وتسالنى كيف راس السنه
    بالله كيف ناسنا الهناك طبعآ سعيدين فى الوطن
    الفرحه ما فرحة فلوس الفرحه احساس بالزمن
    وزى ما بيقاسوا من الظروف اهو نحنا حاضنانا المحن
    ومحنه فى بلدى العزيز فى الدنيا معدومة تمن
    وظروفنا بكره بتتعدل ومن تانى بيزورنا الهنا
    وتسالنى كيف راس السنه
    كل يوم يمر يابلدى فيك انشالله تقفزى للامام
    وربوعك الخضره الجميله بالخير يغطيها الغمام
    والناس تعود زى ناس قبيل لا فتنه لا جفا لا خصام
    وتعودى زى ماكنت اول عش للعصافير والحمام
    ونجيهو سوداننا الزمان وعليهو مانشيل همنا
    وتسالنى كيف راس السنه


    للشاعر عزمى احمد خليل
    __________________

      الوقت/التاريخ الآن هو الخميس 14 ديسمبر 2017 - 14:12