منتديــــات الكاسنجــــــــــــــــــــــــــــــــــــــــــــر

أهلاً وسهلاً بك في منتديات الكاسنجر
عزيزي الزائر الكريم .. زيارتك شرف لنافي المنتدي ، ولكننا نطمع في تسجيلك معنا

للتواصل بين ابناء الكاسنجر بالداخل والخارج وكل الراغبين


    دفتر الأستاذ / محمد الحسن سالم حميد

    شاطر
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    دفتر الأستاذ / محمد الحسن سالم حميد

    مُساهمة  زاهر سر الختم في الثلاثاء 25 مايو 2010 - 14:49

    سلامات يا أحن الناس

    الشاعر / محمد الحسن سالم حميد

    سلام ما سلموا العبّاد
    أواخر الليل قليبن حاس
    سلام والفيها شن بوفيها
    وإنت حجابي والوسواس
    سلام ما خشَّ خيط النور
    على إبر النهار ومقاس
    مشاعر قلبي عند زرزور
    يلاوي الريح بلا أنفاس
    يلم الصور يسوِّي قصور
    وما من خرطة ما من ساس
    يسايسوا الريح .. يساومو صريح
    مع إنو جريح .. وما ينساس
    سلامات يا أحنّ الناس
    ما قهى القمر مبهور
    مع الوز النزل رقاص
    وبين الصفقة والطنبور
    جزيرة غزيرة بالإحساس
    بلدنا متور ومو عتمور
    أرضنا قريرة مو حصحاص
    إذا إنسقت القلوب البور
    يشب شدر الولف ميّاس
    ياالجرف البعد عشرو
    ودبش وكرو وشدير الفاس
    نزل بحرو الطلق ضهرو
    وفتق ظهروا الحلو الأنفاس
    سلامات يا أحنّ الناس ..
    يا درة .. قانقوليس .. أناناس
    سلام والغربة
    لافي مدر فكر تحراها لاب تنقاس
    قدر والفيهو ما كسناهو
    وين بعد الوطن بنكاس
    يا حاحاي مسور الغير
    مسورنا الطير عليها كباس
    سمانا شتا وهجير مطِّير
    بحرنا يحيِّر الغتاس
    إن قلت النخل في نوري
    جنة يقوقي فوقه دباس
    وإن جيت للسهل باللوري
    تسري ليالي لا آخر كاس
    خيرنا كتير ...
    وكان بيطير دي عين والله ما هو يباس
    إحنا أسياده وإحنا بخير ...
    ولا تقولي الزمن عاكاس
    تمرنا ولا حلاوة الغير
    فقرنا ولا غنا الإفلاس
    دلقاً بالعرق ينبلَّى
    يلبك في الضهر والراس
    ضارب في الشمش ينقلَّى
    أرفع هامة وأحلى لباس
    ولا بدّ الشبك تنحلّى
    يوم الناس تقوم هي الناس
    والينعلَّى ماب يندلَّى
    لا ننذلّه لا ننداس
    يا رسن الأمل عنْتِلِّي
    ساب الحلي ركب الباص
    وين يلقى الأهل والخلِّي
    لو لمَّ الدهب والماس
    يا عنتلي كان ودناس
    كان سواي ومو حداث
    لي ضهر الحبيب حرَّاس
    ولي أتر البغيب قصَّاص
    تقلتو تخفف البكيات
    تتقل خفتو الأعراس
    نفير للقلي وحدو نفير
    لمينة بيت مرق رصَّاص
    كان عنتلي .. علِّي آناس
    وكت ضحكةْ سترتو بكت
    سكت منو وليه .. كان ونَّاس
    صحينا مع الدغش ذات يوم
    تبنا رقابنا ما من رأس
    حطب حتى الكلام ده حطب ..
    حطب والحاطبو داسْ الفاس
    تعب حتى السكات دا تعب ...
    تعب والتاعبو حاس الساس
    يا عنتلِّي بير الحلي
    صد للحلي يابسي يباس
    ويتلفت تميره تملِّي
    ماك واعد الصبر بي راس
    روقي عيوني لا تنبلي بالدمع ...
    الدمع منقاص
    لي صبراً حبيبة فضلِّي
    درَّابة وبحر تنماص
    صلِّي على البلد بعد الله ..
    صلُّوا على الحبيب آناس
    سلام لامن نلم يا خلة
    في الحلي الحنيني خلاص
    عليها سلام سلام وسلام ..
    سلام عَد فيها من أجناس
    بلد ما فيها أيِّ كلام
    بلد بالصح بلد بت ناس
    إذا ما أذَّن الآذان...
    إذا ما رنت الأجراس
    سلامات يا أحن الناس
    سلام لامن عشم في الشوق
    يلمنا نحنا ياك وخلاس
    بلدنا متور ومو عتمور
    أرضنا قريرة مو حصحاص
    إذا إنسقت القلوب البور
    يشب شدر الولف ميّاس
    ياالجرف البعد عشرو ...
    ودبش وكرو ... وشدير الفاس
    نزل بحرو الطلق ضهرو ...
    وفتق ظهروا الحلو الأنفاس
    سلامات يا أحنّ الناس ...
    يا أبنوسة .. قانقوليس ... أناناس
    سلام ...
    والغربة لافي مدر فكر تحراها لاب تنقاس
    قدر والفيهو ما كسناهو
    وين بعد الوطن بنكاس
    يا حاحاي مسور الغير
    مسورنا الطير عليها كباس
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / محمد الحسن سالم حميد

    مُساهمة  زاهر سر الختم في الجمعة 9 يوليو 2010 - 2:40


    السرة بت عوض الكريم



    جات داخلة .. زي مرقة غضب من جوف حليم .. في زمن صعب
    رمت السلام .. زي شنطة من كتف المسافر .. بي تعب
    زي رُدخة رب .. الله يا رب
    قعدت على طرف العنيقريب المحازي الواطة ..
    ضايرت التراب ، كسر العويش الفوقو .. شالت باصبعا وشختت شخيت
    الله يا رب
    عايننا فيها نكوس سبب .. للكفرنة وفورة الزهج .. من دروة البال الوهيط
    ما عودتنا تدس عوج .. تكتم فرح .. زي حالة الزول البسيط
    صنقعنا في قعدتنا .. راجعت الوشوش ..
    دنقرنا عن رفعة وشيها المتعب الجاد الرحيم
    الطيب السمح المعافى .. رهاب رهاب ينشاف وسيم
    إنوهطت فوق العنيقريب القديم
    من تاني ضايرت التراب ، كسر العويش الفوقو شالت باصبعا وشختت شخيت
    وقالت : تصدقو آ ولادي بقيت
    أبيت الليل أفكر في التميرات القدر فوق راسا ما خمّت صبيط
    غلبا الجرورة الفوق ضهرنا تنزلا ..
    تطلق وشينا مع الجماعة ..
    شن دهانا دي كم سنين والحال وقف قطّ وحلف ما فيهو لو نقاط بسيط
    كان بوشنا في حش التمور .. الليلي دوشنا مع اللقيط
    أي لا حكت دي ولا بقت .. ما كنا قايلين في حياتنا يجينا أقسى من المضى
    ساعة مروق الإنجليز قلنا الظلم فات وانقضى
    تاريهو كمتر .. وقام دقون .. حلفا وعشر .. معيوقة نال
    دمسيس ... ضريسا .... وشوك جمال
    الله يا رب كربك كرب
    عاولى التمور .. الواطة بور .. الناس حطب
    بابور شهور غلبان يدور .. مافيش مطور .. ويجيك بعد ده علم طلب
    الله يا رب العالمين
    الما جحدنا نعمتو في الشوف والسمع راحة الولادة ولا قلوبنا قسن ولا غيرنا دين
    في الجابو ما قصر حمد .. في الشالو ما قلنالو وين ماشيبو وين
    عدلت نعال مقلوبة في الجيهة اليمين .. حدرت شمال
    زمناً مو دا الحيكومة كانت بت حلال
    بي حالا .. بي حرب الجنوب ..
    بي قلة المال في الجيوب
    كانت رخية العيشي .. إلا ترا العوين الكبرو .. كبرو مليسين
    علمن يطير .. إن كان هو ما فدّر عوج ..
    ما فادنا شيء ومحق القبيل لمينا هين .. في هين .. في هين
    يا حليل رجالاً سكتن غدراً غشاهن بالقفا .. ولي الليلة سيفن في الجراب يهرج سنين
    دا زمن قواسي .. زمن ضلالة .. اوانطجية .. زمن حقارة .... زمن مهين
    لاقين هواكن ضروا .. ضر .. يا عسكرياً ما انتعظ .. كتل الرقاب بيودي وين
    ضر .. يا جلاليباً رهاف .. ذمماً خفاف .. ضر يا ضرر .. ضر .. يا دقين
    منصلبطين عرق النبي .. وبالنار بتلعبوا يا عوين
    لي الحول قريب .. درب السلامة .. تخوجوا بي درب الحرب
    غتي قلب واللا الحرب .. بقرة حلب .. والأرض صين
    ما كان عمل .. ما كان دا دين
    يا أرزقية تخمجوا دم .. والدم مو موية .. ومانا طين
    منصلطين في الناس دحين .. لامن يجي اليوم الفصل والحق يبين
    وين تمشوا وين تنسلوا .. وين
    كان طال وكان قصر الزمان .. الحين بحين
    كب يا رجالاً سكتن غدراً غشاهن بالقفا .. ولي الليلة سيفن في الجراب يهرج سنين
    وإنأوهت .. وحسيت بأعماق الشوارع والتواريخ المجيدة إنأوهت .. وأدتني عين
    صنت شويتين .. كوركت .. هيى يا بنيه وكتنا راح .. يا بت شمشنا إدهدهت ..
    شوفيلي شافع ود فطين جاء من الطحين
    الله فترنا من الطحين
    وكان الوقت زالف عصر .. عين الشمش مشغوله بي دوشة سحاب
    عرق المراكبية البعاد راحل مع ريحة التساب
    ما تدري مارقي من البيوت الحلة .. واللا من التراب
    الناس تقول مدقوقة طالعة على الحقاب
    مفلوقة بي حجر الصعاب المرة .. نازلة على البحر مشروقة بي موية السراب
    الفرة .. مشنوقة عقاب .. بالمرة من كتر العذاب
    الحرة في طايوقه داب
    يا المرة كيف بقت الرقاب مسيوقة بي قيد السلاب
    منشرة من نشر الحجاب في عروقا .. وإشتد الخراب
    من بعدما انبلج الفرج من ضيقا .. خدعوها بي حيلة كتاب
    رفعوه فوق سن الحراب
    ودهت الهزائم خلقتا
    فالناس بدل عن نقتا
    التلقى فكة ريقتا
    وبدل القصور الفي خيال .. التبقى ماهلة كريقتا
    وما جاتا راحة طلقتا .. إلا التعمر طلقتا
    بي بندقيتاً حقتا .. بي ها الشوارع وبقتا
    تنسدا منك دقتا .. ودم فلقتا .. ومر شرقتا .. ونار شنقتا
    يا دقن دينك سرقتا
    قطعت وضوها انشرقت .. مسحت وشيها إنشهقت
    قال نست ما تاكت العوضة التحت .. عن مرقتا
    دارت تقوم .. مسك العنيقريب الحنين طرقتا
    رجفت بشيش عن نتقتا
    رجفت بشيش من الغضب واللا التعب .. فتر السنين ..
    واللا الكبر دا الما قدر يمسح سماحة خلقتا
    زي نيتا البيضة الشعر .. وزي موج بحر كان الجبين
    مديت يميني أساعدا ..
    ردت يسارا تباعدا
    وقالت لي : أبوي وفر ضراعك للبلد
    وادخر مروتك آ ولد
    لي يوم بحين
    احفض كرامتك تحفضك .. الموت ولا العيش المهين
    الموت نفاد الما نفد .. الموت حياة الميتين
    أختاها جنة مع الفقر .. وادخل جحيم المتعبين
    وإن ما قدرت على دا أبوي .. رب لك دقين
    وصنت .. رب لك دقين
    وضحكت .. حمدنا الله الحنون .. جيداً خلقنا بلا دقون
    وضحكنا زين
    ساقت حديثا .. على الخراب الشوفتو ما دايرالا عين عقب متاقانا الرياح
    رفعت قران شوك الصنط .. ساسوية جاية من المراح ..
    يا خيري ودي المستراح
    والشوكة تحت الدوكة .. يا داك الركين
    الشوك بمرق الشوك .. شوكاً فينا شين
    مراقو رب العزة .. شعباً ما بيلين
    الجاي حيكومتنا .. لكن الزمن دبوية .. داير النهمة .. وينكم يا الخزين
    ما قلّ حاشى صبرنا .. لكن لا متين
    دعكت عيونا وصنقعت .. كان الغيوم إنجمعت تقلت على الريح النصيح
    كان المطور شو ترعت .. زي باكي فوق دم الحسين
    لكن ده وين .. والتاني وين
    وإنلوعت .. معقول في ناساً ما وعت لي الليلي بالم .. بين بين
    وكيف وإنتو نوحنا من الدعت .. مومنا من جحر الدقون الكاكي يلدغ مرتين
    والتالتة قرصة أبو الحصين
    حسيت بأنها دمعت .. وشهقت عيونا الدمعتين
    حسيت بأني متل حجر .. جدعوهو في نص البحر .. قام البحر بنى فوقو طين
    حسيت بأعماق الشوارع .. التواريخ البعيدة إنأوهت .. وأدتني عين
    الجاي حيكزمتنا .. كيف .. ومتين .. ووين ؟
    ومرقت متل دخلة غضب .. صدر المسامح والحليم
    في أيام عجاف
    دي السرة بت عوض الكريم
    مرة ما بتلاوز .. لا بتخاف .. زي الضفاف
    الما بتهاب ضنب التماسيح والكلاب .. قومة البحر واللا الجفاف
    مرة من قديم .. مرة بت قبائل .. قالوا لا .. وإختارو في الحق الجحيم
    من رفقة الفسل الخلا .. وكانت نعم تدي النعيم
    مرة من صميم ضهر الغلابة الما بتنكس راسا .. غير ساعة الصلا
    أو ترمي تيراب في التراب .. أو تستشف وجه السديم
    السرة بت عوض الكريم
    ما فيها من عادة الحريم .. غير السماحة القدمت قدم الضهب حافضنو في حقاً قديم
    في أقصي كيم
    ما فيها من طبع الرجال .. غير الأيادي الخشنة زي قولة النصيحة وقت يكدب في الصميم
    ساعة يكون الحكم ضيم
    تسعين سنة .. ويا السرة بت عوض الكريم
    بصرك بصير .. سمعك سميع .. نضمك نضيم
    بالك محلو صبي وسليم
    تسعين سنة .. عودك أمداً ما انحنى .. شامخ بلا البان القديم
    تسعين سنة .. ومن فتنتك .. استغفر الله العظيم
    جوك الرجال يا السرة بت عوض الكريم من وين وين
    لا الكلو طين أغراك .. لا السمح الوسيم
    آ السرة صددتي المشايخ والعمد .. مرسالا ليك ..
    ضيعت بي أنفه البشارة عليهو ... كيف قلبك صمد يا بت قصاد المغريات ..
    الجان يجن والهام يهيم
    والبشروك بالجنة من فقرا البلد .. أسقوك بالغفلة المحايات .. ما نفع
    رتباً كبار .. قلتيلا .. لا
    شعراء ومغنين .. خت فيك دوداي غناهو .. ما شفع
    الجان يجن والهام يهيم
    والإنجليزي أسلم في شان خاطر هواك .. ساعة طلعتي تجيبي عود السيسبان
    إتصيدك آ السرة بت عوض الكريم ... مرقنو كرعين الحصان
    والجاكي ناط .. كتفتي بالليل في اللمين .. مع الفجر طلبك عفو وسترة
    وعفيت وسترتي .. يا السرة القوية .. بقتلو توبة سوية من هتك العرض
    يا بت ها كيف بعد الحسن .. ما تاورك قلبك على زول في الأرض...
    ستين سنة ..
    ويا بت بلا النيل وحدك واقفاها .. و النيل إنحنى
    ستين سنة
    ما جهجك فقد الحسن .. لا يفقهك فجع الجنا
    فجع الجنا الويحيد تحت خيل ميجر السجم الرماد
    الإنجليزي وقت مرورو على العباد
    وجناكي ناش عين الحصان بالنبلة .. ناش طربوشو
    قيح العسكري إنحم .. وحم بالسوط جناك في إطن المسيمح ما اتلفت
    والهاشم الواقف وقع .. والدم هدر ..
    وكان زي محمر في الكجر
    بي إيدو قابض نبلتو .. وفي التانية غامت للحجر
    صرخت صليحة وشكعت فوق قيحة .. كلْبينا الزرق ومن يوما داك ما شافتن
    صيحة البطان قيح البقل .. نهمت غنا غضب البنات عن زفتن
    فس .. يا كديس الإنجليز .. كلب الترك يطفر من الفارة وينيص
    يا مكري .. صبرك .. يا رخيص
    الفافنوس .. البوص .. لحاية الهردبيس
    تمر البلد شال شيلا جد إلا الحصا تبل مارقة صيص
    كوسلك بلد .. بلدك واباك .. رفسك رفيس
    نفضك نفض .. بلدك تضادي .. ولا مغيث
    قلبت عليك بطن الرجال .. شقيش تقبل .. يا خسيس
    يا قيحة .. حظك في الحياة وفي الميتة مافي .. وموت تعيس
    عفنت كرشتك دون ترب .. منفوخة للغربان فطيس
    وفوق سكة الماظ الصعب .. هاشم - حلالي - قدل عريس
    هيلة آ رجالاً عرستن .. شمش المشارق ليها ميس
    هيلة آ رجال .. هتفت نفيسة وحرّقت توبا الوحيد
    عقدت شديد .. قرقابا حافيي ودون قميص
    جرت الكرارق زي برق .. لفحت من السحارة لي هاشم حريرة وقرمصيص
    وكان الفريق إنخم ما فضل بشر ..
    ما هزا زلزال الفجيعة المرة .. والدماع طفر
    دايرات يولولن الحريم .. صنت وقت صوتك نهر
    وكيفن زفتي وشيي ونعلت قفاهو .. شيخ الحلة عن قال لك قدر
    ولميتي هاشمك ونبلتو .. وفي إيدو الحجر
    صبغ الحريرة .. القرمصيص .. الدم ملاك ..
    لميتي زي لمة ملاك ..
    آخر عمل خير في البشر
    جاك الصبر من وين .. ولا قلبك رجف .. لا آهة .. لا دمعاً طفر
    رشرشتي بي إبريق أبو .. وبي دمو نبلتو والحجر
    خيط الحريرة القرمصيص .. كفنتي بي رفت القماش ..
    الساكوبيس الخاتا لي يوم الطهورة ..
    مرقتي لاقوكي الرجال بين الغلب إنقلبو
    ومتحزمين زي يوم أبو
    دمع الرجال هزاكي
    آه خارت قواكي
    طفرت دموعك والحريم كسرن عليك
    قلدوك رجالات الفريق فوقك ضي الشمش إتكا
    وبعض المراضى المقرفين قلدوكي لي شي بلا البكا
    وكانت دي أول مرة يتبكي في الفريق ..
    وبي حرقة زي كل الرجال الخيرين ..
    درفون ضرب بالنبلة طربوش إنجليز ..
    عور حصان الإنجليز ..
    لا انزح لا زاغ لا جرى
    وكانت دي أول مرة شافع في الفريق بي حرقة .. ذي كل الرجال
    الناس تشقلو ود لحد في مقبرة
    سبلتي ما انقطع الدرب .. دفقتي بي قرعو الطشت .. فنيتي في البير النحاس
    جا طشت جديد .. وقرع جديد .. ونحاس جديد .. وما انترو ناس
    ناساً تقلب الدنيا.. لو لاقية راس
    دور والمعاك ما انفرقو ..
    وين وشك الصعب الصلب .. إن صر في الريح بعذقو
    وإن صر في الموج غرقو
    يا بت كضب ..
    معروفة ما من قوة تحمي الفرح واللا الترح حين إندلاقو على القلب
    لي دور حديث المنغلين ما إندل من فورتو وهبد
    دماً صعد من ها الترب .. لا بد من ينزل مطر .. رحمة وسعد
    ما بروح سراب .. هاشم نجمة الفنجرة .. نشهد على إنك ولد
    طمنت بي فعلك بلد .. من إولها ولي آخرها
    رجعت أبوك من القبر .. قصرت لسنات الكتر .. سكت خشم المسخرة
    هزيت رجال جوغة غريق ..
    بس كيف نضيق ضيقاً عميق
    يبقى الحجر فلخة جبل .. والنبلة تصبح منجنيق
    أو بندقية معمرة
    ساق نخلة في الطين الطري نازف تشق المقبرة
    وقصب التواريخ ينبري ودمك عمار المحبرة
    نشهد على إنك ولد .. بركان جسارة وفنجرة
    زي ما شهدنا على أبوك .. فرسان قبيلتك من ورا
    ويا السرة بت عوض الكريم .. إنك مره
    ولدك جدع ما بندبوا ..
    حي في وليداتنا .. الدشر لعبن .. طعيم النوم أبو
    ولدك بخيت .. ما دام رقد في صدر أبو
    ولدك شفيعنا مع النبي .. ولدك يمين يكفينا كلنا مغفرة
    وهنا دا الدرب .. حرة قلب.. صرة وشي
    ولدك وعدنا بكل شي
    وما في إيدنا حاجة نخسرا
    يا السرة بت عوض الكريم ..
    مع إنو كم سنوات ولا بحراً طمح .. لا سمانا كانت ممطرة
    كان كل ما نحفر .. يلاقينا الترا
    عن جينا لي دفن الترب .. حسينا كم ملك إندفن
    جات غيمة من دون الوقت .. جات نسمة هبهبت الكفن
    بي دمو نبلتو والحجر .. خيط الحريرة .. القرمصيص
    دخرينا نام آ السرة .. في صدر الحسن
    فاتونا بي قدم الصلاح .. سبقوك على جنة عدن
    وسابوكي نخلة وسط رياح .. بين الزمن
    لكن ضراعك هو الضراع .. على رغم أقداراً قسن
    ماسكي الشباطين في الصراع .. لا بودة لا سوس لا وهن
    تعبر قليبك زي شعاع .. ما غيرت لونو المحن
    ضلك متل بالك وهيط ..
    عبرت مراكبك بي شراع صبر إحتمالك كم محيط
    ورونا في الزمن العبيط .. يا تربة .. يا كل الوطن
    مافيش وسيط إلا الصراط المستقيم
    السرة بت عوض الكريم
    الله .. أيا مره من قديم
    سلطان وعن ساعة الفزع مملوك نشيط
    عادية زي قولة سلام .. حلوة لسان .. لكن إذا تغضب سليط
    مره ما بتفرط في الزمن .. وفيها الزمن لحظاتو أبن
    ساعة مروق الإنجليز .. ضبحت غنيماية اللبن
    طلعت على ناس القبور ..
    كشحت ورا طرف القبب عيشا المجودا للطيور ..
    ومن زمزميتا والدموع .. رشت قبر هاشم عقب قبر الحسن
    والباقي لي كل القبور
    في توبا صرت هين من القبرين بعد ما انبركت ..
    بركة عشق .. بركة شكر .. بركة وفا
    غيبة الشمش جبرت خطاها على الرجوع .. والقلب من شوق ما اكتفى
    ولسع في غيمة من الدموع تبراها لي طرف الفريق ..
    شيلة نفس تطلع مطر .. ختة نفس تطفي الحريق
    آ السرة يا دوب يندمل بين الضلوع جرحاً غريق
    فاتو إنجليز فوق دمها .. وعين إنجليز
    مبروك وحمديل السلامة يذكرك ليلة الحسن سار لك عريس
    أو من ضراوتو يذكرك كتل المنيحيس التعيس
    ناس تملا في الأزيار .. وناس في كل كيم واقدالا نار
    ناس نازلة في الحيشان تقش ..
    ناساً ترجع في المضى .. والجايي سودانية مش
    السرة ليلها قلب نهار .. الواطة غبشة الناس غبش
    والروح خدار من حلتها .. النوم فر طار
    باكر دغش شدت على ضنب الحمار
    حموها للميجر تخش
    عقبت على بيتو العصر .. قصرت مع بتو الحديث
    دهت المشايخ والعمد .. سفهت عمايل الإنجليز
    ظلم الحكم ياهو الحكم .. كان من جوامع كان كنيس
    يبرا السما ..وتبرا آمحمد سيدي .. ويبرا المسيح
    ورجعت بلا الموية الروت .. حيضانها لي جدول فسيح
    لي دور معلقة للبخور في بيتها عامر بالمديح
    لي دور تزغرد ما انقرش يا السرة .. حسها كيف نصيح
    لي دور مع الشاي والزلابية مع الضبيح ..
    الجوكي بالخرفان سمان .. والجار له تور
    لي دور كوبيقاتك تدور
    ما قصر الطمباري .. جاك ملك الدليب
    رحلت بروش الزاوية عندك في الفريق
    آ السرة ما فضى عنقريب
    آ السرة بينات الخلوق .. مراتاً الليل آ بحوق
    لي دور علي كتف الفرح .. تتعب عيونك وتستريح
    لي دور تكلك قاح تكية .. آ السرة دارك ماج ضريح
    ويومين بعد سقت الخدار بي إيدا .. جيهت العقاب
    قامت معاها تسع رجال .. بي نوبة فوق ضهر البخار
    قالت عليها نذر قديم .. واقع عليها نذر عزيز
    إن حية في الدنيا ونصيحي .. إن كان تشوف بي عينا فوت الإنجليز
    إن كان تطق زغرودة في ضل العلم ..
    خلوها تدخل للختم .. حرموها يكفيها الضريح
    شوف عين تشوف الأزهري .. وبي ما يكون .. صح النذر .. ما راح وهم
    دماعا رقرق في العيون .. عن ساعة المحجوب نضم
    وإنشر عِن زروق بزم
    ما كان تكون آ قيحي حي .. وأنا أفش مغستي وأصفي دم
    من تاني يا رخم الوخم
    ما دام حرتناها الأرض .. سندنا .. تيربنا .. بوغنا .. ومسحنا قمحنا .. هسع في وحم
    هاشم ولا أسفاً عليك .. وعلي رفاقتك لا ندم
    ما دام بقينا أسياد بلد .. ما فتو يوم أبداً قسم
    والفوتك يا الإنجليز .. يعقب علي باقي السجم
    آفاتن أولاد الحرام .. أكبر من آفات العجم
    دي السرة بت عوض الكريم .. سرة عقاب
    سرة تواصل بيننا بين رحم التراب
    والجاية في الزمن الرحيم
    مره من قديم
    ما فيها علقنة الرجال .. ما فيها دلقنة الحريم
    مره بت قبائل .. قالوا لا .. واختاروا في الحق الجحيم
    ومن رفقة الفسل الخلا .. وكانت نعم تدي النعيم
    مره من صميم ضهر الغلابة الما بتنكس راسا غير ساعة الصلا
    أو ترمي تيراب في التراب .. أو تستشف وجه السديم
    جات داخلي زي مرقة غضب من جوف حليم .. في زمن صعب
    ومرقت متل دخلة غضب ..
    يا السرة ليم ..
    آ السرة ليم
    آ السرة ليم


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / محمد الحسن سالم حميد

    مُساهمة  زاهر سر الختم في الجمعة 9 يوليو 2010 - 2:41

    نـــــــــــــــــورا

    هي .. أقيفن .. نورة فيكن
    نورة نقاحة الجروف ..
    نورة حلابة اللبيني .. للصغيرين والضيوف
    نورة ساعة الحر يولع .. تنقلب نسمة وتطوف
    تدي للجيعان لقيمة .. وتدي للعطشان جغيمة
    والمخلي الحال مصنقر ..
    في تقاة الليل تندقر .. تدي لي باكر بسيمة
    تكسي للماشين عرايا وفوقا إنقطع هديما
    ما عرفتن نورة إنتن .. قولن إنتن شن عرفتن
    نورة بت الواطة أخيتي .. نورة اخت كل الغلابة
    نورة حاحاية الشقاوة .. نورة هداية الضهابة
    الاراضي الياما أدت .. نورة بقت من ترابا
    وماشي في الأعماق سحابا
    مشتهنها .. والله جابا
    للجنوب طبلاً يهدهد .. لي مشاعر ناس تعابة
    وللشمال طنبور يسكت .. دمعة الميتين كآبة
    ما عرفتن نورة إنتن .. قولن إنتن شن عرفتن
    نورة عايز تقرأ قالت .. فوقا حيطة الدنيا مالت
    ختت الكراس وشالت .. منجلاً صالت به جالت
    لامن إنجرحت به شالت .. للتراب فوق إيدا كالت
    ومرة يوم في الدونكا لدغت .. جاء الفقير بالليل حواها
    ويوم ملاها الهم قطايع .. جاء البصير بالنار كواها
    ونورة ما قدرت تمانع .. تقنع الناس المعاها
    ومرة شافت في رؤاها طيرة تاكل في جناها
    حيطة تنمغى وتفلع .. في قفا الزول البناها
    في جنينة سيدي سمعت .. تمرة تصقع للوراها
    الأرض لابد ترجع للتعب فوقا ورعاها
    شافت النيل موجو لاها
    الخليقة بقت إلاها
    الشمس طبقت ضحاها
    نار عقاب إنساب مكسر .. فوق تكليات متاهة
    وضو من الله .. رهاب مكتف في وتيد الليل معاها
    بين حضر بلدا وخلاها
    فسرت للناس رؤاها .. وقالوا جنت ومو براها .. ونورة زادت فوق شقاها
    وصدت الأيام تخش .. تبني لي عصفورة عش
    في السواقي تشوف عزاها .. لما شوقا يسوي .. وش
    تسقي تزرع .. تسعى تصنع .. للنهار في الليل تخش
    عرفت الشقا والشقاوة إلا ما عرفت تغش
    شايلة طولة البال من الله .. ومن أراضينا الإثارة
    وماشي تكدح طول نهارا
    وترجى لما الليل يفلل .. تسرق ألمي عشان خدارا .. عشان صغارا
    ولما ترجع لي ديارا .. تنزف أحلام الفقارى
    من عويناتا الحيارى
    لي غبار الحال تقش .. فوقو للآمال ترش
    نورة تقعد صاحي تحلم .. بي بيوت بي نور ودش
    وبالمحبة تشق دروبا .. ولي قلوب الكل تخش
    نورة تحلم بي وجود .. ما مشت بينو القيود
    أفضل أفضل بي كتير .. بي وطن من غير حدود
    نورة تحلم بي عوالم .. زي رؤى الأطفال حوالم
    لا درادر .. لا عساكر .. لا مظاليم لا مظالم
    نورة تحلم .. ولما تحلم نورة ترجف
    ولما ترجف نورة تحلم ..
    ولما ريح الواقع المر .. لي عشيش أحلاما ينسف .. نورة تنزف
    ولما تنزف بالا يهتف .. يوم حا تنصف يوم حاتنصف
    وتبدأ تحلم .. ولما تحلم نورة ترجف
    ولما ترجف نورة تحلم
    صاحي تحلم.. وصاح بتحلم .. صاح بتحلم


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / محمد الحسن سالم حميد

    مُساهمة  زاهر سر الختم في الجمعة 9 يوليو 2010 - 2:44

    طعــــم الدروس

    وريني شن طعم الدروس
    ما دام بكانا مشي قطر
    وكيف ذاتا ترتاح النفوس
    تقبل قرايتاً في سفر
    يا يمة حان الامتحان
    من وقتو بس فاضل شهر
    ما اظنِي من جور الزمان
    انجح واجيب ليكم نمر
    وريني شن طعم الدروس
    ما دام بكانا مشي قطر
    وكيف ذاتا ترتاح النفوس
    تقبل قرايتاً في سفر
    كيف زاتي يا نبع الحنان
    انجح من الام السهر
    عمرك سمعتيلك جبان
    خاض المعارك وانتصر
    زينوبة كل ما افتح كتاب
    القاك في اول سطر
    القى الجداول والصحاب
    القى الجناين والتمر
    في الحصة عقلى انا قام سدر
    يمه المدرس لو فكر
    كان يلقى قاعد فوق ككر
    في الدونكا لسع ما فطر
    يسمع كليمة يا عشاى
    واغلى الحكم عند الضجر
    انا قلبي كلو على جناي
    وقلب جنايا على حجر
    والله مش لو كان نهر
    لو كالني بسيطان بقر
    ما دام عقيل الجن سدر
    ما اظنو من عندك حضر
    بذاتو ابوى تلقاهو قام
    فاتح كتابو مع الفجر
    يقرأ ويرتل في كلام
    ما بفهمو الناس الكفر
    زينوبة كر من حالى كر
    قاعد لى فوق كيمان جمر
    غربة وكمان حالاً فقر
    عذبني قبل اصل القبر
    الشوق متل شوك الكتر
    طعن الجسم لمن خدر
    والله لو ما منجبر
    ما كان بفارقك بي شبر
    زينوبة دنيا الاغتراب
    خلتني زي ورق الشدر
    انحت من عدم الشراب
    عم الاراضى وانتشر
    الغربة اصلوا طعيمة مر
    لكني بعقد بالجبر
    لمن سنين الهم تمر
    يا ربي الهمني الصبر


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / محمد الحسن سالم حميد

    مُساهمة  زاهر سر الختم في الجمعة 9 يوليو 2010 - 2:46

    البحـــــث عن ذاكرة وطن مفقود


    عَبيّت زُوادتي الرّيقة من بايت القَوَى ..
    الوطن الدّشَرْ ...
    غيمو الرّبَطْ
    ساعة بقينا من الرّوَى ..
    فرسخ مطرْ ...
    سافرت لِكْ بأشواقي لآخر المنافي ..
    بَحّتَّ في كل المخافي ..
    وكُسْتَ عَنِّك في الخُرَطْ
    في التواريخ الرؤومة ..
    بين نقوش نبتة ورسوما
    في الطّرابيل العظيمة
    وبين لُغة مروي القديمة
    وخَطْ .. في خَطْ
    راجعتَ بِكْ كل الاسامي... البعرِفا
    كل الُّجمل .. حتى الضمائر ... وأحرُفا
    صحّحتَ بِكْ زمني الغلطْ
    باخَتّبِكْ قلبي الشّقِى ..
    وبشرتو بي لُقْياك عَبَطْ
    يا طيبة زي شارع وَسَطْ ..
    يمشيبو كادِح وارزقي
    وممتنعة زي قبض المياه
    والمافي
    والما بتلقي
    غالِبني جيتك أصادفا
    لا في المعابر والموانيء المُترفة
    لا في المطارات الوسيمة كما الفراغ ..
    لا الأرصفة
    كل الدّروب التّعرفيها وبعرِفا
    التألفيها وبألفا
    خَشّيت دغيش سِعْن الدِّني المرفوع على سِيبات وفا
    رَوّابي كان قُطّاع غني ..
    وشوقاً مَفورِنْ وانكفى
    قِدّام خُطى الوجد الِحفى
    غابت صباحات القُرُب ...
    وبَقّت ضلامات الجفا
    و ضَي المصابيح الجريح ..
    كِترْت علي الرّيح .... وانطفا ؟؟؟
    هوي يا بِنيّة من الغُبُش ..
    من حَرْ أباطهم مُترفة !!!
    وين انتي شان نرقد قَفَا
    وين انتي وين .. في يات دُغُشْ
    ما بيننا بين غيبتك كفى
    لو بَقّ حِسِّك في هشيم دبش الضياعات والسأمْ
    زي أغنية شوق ..
    زي نشيد ..
    اندبَّى همسِك زي نغمْ
    او خبّ خطوِك زي شهيد ..
    رَفّتْ مسيرِتِك زي عَلَمْ
    ما كان مهابات الصِّقور
    (نخّت) تحت رخّة رَخَمْ
    وين انتي وين ...
    ما كان هجم ديش العجم ....
    والدِّنيا ضَوْ
    وامسن سبايا الاغنيات
    العُزّل ... ألآه ... شِنْ تسوْ ؟؟؟؟
    ولافي الكفوف الخاوية سيف ...
    لا في الكتوف الزاوية ضَوْ !!!
    دَلّجتَ درب الاربعين ..
    صاقَرْ قوافل الرِّق .. سنينْ
    برّاً
    وبحراً
    حتى جَوْ
    أشريكِ قُلْتَ من الزمنْ
    واعتق معاك رِقّة مشاعري ازوِّجك كل الوطنْ
    كل الرِّجال الحملو ارضك بالحلال ...
    وافتق سحاب العشق شَوْ
    ولا بنتي في الزِّنج البَجَمْ ...
    لا كنتي في العرب الأشوْ
    لافي شلوخا ..
    ولا الوشم ..
    لا في شيوخا ولا في عَوْ
    بل فيكِ غشّاني الزمن ...
    ادّاني صَرْصَرْ وبعتو نَوْ
    كوترني .. بي حبل الوَخَمْ
    كُلْ ما انقطع توْ .. باَنْ لي .. توْ
    ناقِزْ وراكْ ..
    ناقِزْ وراكْ ..
    ناقِزْ وراكْ ..
    انترْتَعَتْ رُؤياي ..
    هَكَعْ ..
    ما بين أريت ... يا ام زين ... ولوْ
    وبين تبقي وين ..
    لاكْ في الوجود
    لا في العدمْ
    لا في الحقيقة ... ولا الوهمْ
    لا زين
    لا شين
    لا البين بين ..
    يا راحة الباقالو هَمْ
    لا عنِّك أفتاني الزّمان ..
    لا مِنّك إنقطع العشمْ
    يا ريتو أغناني الكَمَانْ
    آ طيبة عن صوتِك نغمْ
    من أعلى ميضنة فيّي كان أعلنتَ موتِك للأُممْ
    أو .. صِحْ بجيتك لى الرِّمَمْ
    لكنو صمتك طال ...
    وحَانْ ميعاد زفافي على الألم
    قلت ارفع ايديني واقول ...
    خاني الصبر ..
    خان وانهزمْ ؟؟؟
    زي ما انهزم كمّين نبي ...
    وخانت على التاريخ ذِممْ
    آ طيبة أخافك ؟؟؟ واللاّ اخاف
    السُّبة واللّعنة الوبيلة ؟؟
    تحل وراي كما الجفاف ؟؟
    أو..... تار على اكتاف قبيلة ؟؟
    معلمي اللّــــه من عتاد ..
    يبرِدْ حشاها ... ولا في حيلة
    بَلا تأمِّل في البُعَاد .. سنين ...سنين ..ودنين ... طويلة

    وكيف ؟؟ وكمْ ؟؟
    والإنأخد بالدّم غَصِبْ ...
    مافي البرجِّعو إلاّ دَمْ !!!!


    آ طيبة هيلة ..
    سلام
    عوافي
    يا أصيلة .. كما المَعَانا
    أو .. بديلة عن اللِّي مافي
    يَمّه أدخلي على غُنانا ..
    يا أمُرقي من القوافي
    يا أحذرينا وما تخافي
    وما بنخيّب حاشا ظنِّك ....
    ينفخوها وما بتموتْ
    حيّة نارِك ... حيّة يوتْ
    خُتِّي قِدْرِك في الأثافي ..
    يوسف الفي الُّجب بيمرُق
    ضاربا ريقة اليلقى قوتْ
    روقي أكنِّكْ ..
    واللاّ كَنِّك ..
    تاوقي في البحر الخرافي ..
    يونِسِك في ياتو حوتْ
    سَمّ ينده جوفو حافي ..
    وهِّطينا على الأثافي....
    وهِّبي نارك لا نموتْ
    يا حمامة غار محمّد ..
    يا خيوط العنكبوتْ
    يمة كُسناك ضُمّة مافي ..
    الدّروب وين غيّبنِكْ ؟؟؟
    في سؤالنا الضّارِي عَنِّك ..
    سَدّن ابوابِن بيوتْ !!!!
    والبيوت البشبهنِّك ..
    انكرننا وانكرنِّك !!!
    ننكشف لا لوم عليهن ..
    بس ها كيفن يسْتُرنِّك ؟؟
    وفي سُكاتنا الجاري مِنِّك
    رحّبنْ بينا السجون
    الدرادر والمنافي
    فينا مَنْ روّح فدايتك ..
    وفينا من لا زال ...
    وفينا
    مافي من بدّل لرايتِك
    وانتي في ذات السكوتْ !!!
    التراب يتشهّى حِنّكْ ..
    السِّحاب عابر يفوتْ
    واللاّ يكمُد للعيون
    بالغُبار غُمّة وسوافي
    وانتي يا آخر المرافيء
    يا امْ وجوداً بات خرافي
    في صحاريك داخ غفاريك ..
    من برِد زمنو الرِّعافي
    دون كواريك ..
    مات واتاريك
    غبتي بي كل المدافيء
    يا لساريك .. لاك موافي
    لا كمان قادرين نسيبِك نمشي في الزمن المجافي
    ما عهدناك عاد تخافي
    كانفعالات المُراهِقْ ..
    شابكة كالشّجَر الضِّفافي
    خيلِكْ - الرِّيح - حين تنهّدْ
    لوحة التاريخ بيشهدْ
    لونا والدّم الإضافي

    إلاّ يا وتري وغُناهو ..
    راحة أنغامو .. وعَنَاهُو
    يا نبي الثورة الغشاهو
    برداً أكتر من غُتَاهو

    الاّ يا بِتْ جاك زمن دارِعْ الأيام قُلُبْ !!!
    الدفاتر والكتبْ
    إستحمّتْ بالغُلُبْ
    التلاميذ النُّجُبْ ..
    طيّشا الفقُر ....
    الغبينة
    صنّت الأجراس وجينا
    إلاّ يا .. آخ ... ما لقينا
    الجوامع مستباحة ..
    والمصلّين صَرْ جُنُب
    الكنائس جالبا دينا !!
    والمدينة تبيع عوينا !!!
    لي النخاسية الغُرُبْ
    لي اللُّحاسية وعُقُبْ
    تشتري آفات الرُّعُبْ
    والهتافات الجُرُبْ
    عربدت باسم السّما ..
    توّكت ريح السُّحُب
    ومن ضُروعاً .. كان تكُبْ
    كل أطفال الفقارى ..
    وكلهُنْ في فَدْ شُخُب !!!!

    في اللُّغة الجرسية .. سُبْ
    في التُّقى النجسية .. سُبْ
    في الوقار الفاوه ... سُبْ
    في شعار ما ساوى .. سُبْ

    واللاّ اريت ما كُنّا منك ..
    لا في بيناتنا القُرُبْ
    كُنّا اقلاّ نشوفو عادي
    التردِّي الجاي وغادي
    سادي في النعم الزيادي
    وابن آدم بالأيادي
    لى سُترة الحال يكافِت ..
    غابة غابة ..
    ووادي وادي
    ينبح المسكين يا طيبة ..
    طيبة يا راحة الفتارى
    وواحة الفي الصّيْ حيارى
    عورة الشُّرفاء الفقارى
    سُترتها ولُب المباديء


    يا بنية الأُجّر ام خير ..
    أو نبية الشجر الطير ..
    يا رسول البسمة للاطفال ... حبيبة نيل بلادي
    يا طليقة الغيم ..... عروس طين البوادي
    المناديل بانتظارِك ... والايادي
    معبّا شوق ..
    يا طيبة ..
    طيبة ..
    طيـــــــــــــــــ ...
    ولا حياة لمن تنادي
    بَكاك بكيتني .. سَكَتْ برايا

    كنت حافي على إبر ..
    بِتّ حابي على شظايا

    من انكسار رمّاشْ عيونِكْ
    فوق مسام سام المرايا
    من كُتُر تعباً تعبتو ..
    قلت ألقاك ما كَفَاية
    يا تكمِّلي فيّي صمتِكْ
    يا أخلِّص بيك غُنايا
    دي الحنايا وراكِ يبستْ
    وامست آشميق الخلايا
    وبِتّ أمسِّرْ من حروفِكْ
    وأفتل الأيام .. قراية
    نبّقْ الغيم .. برضو إرضِكْ
    ما استجابت لي سُقايا

    وقُلتَ اخطِّكْ بي دمايا
    يا اصابعيني ابقي ريشة
    ويا شراييني الدواية
    وقنِّعي الرِّيح الورايا
    النّكعْ بالخيل ..
    محالاً ..
    يدِّي بي بَقَر الدّرَايا
    انتهت كل الخفايا
    وقلت اكوسلِك في الخطايا
    لمّا في ذات لُقيا حَرّ ..
    وزاد هواكي على هوايا
    وقمتي خنتيني معايا ؟؟؟
    اشتكيتِك لى القمرْ
    وضُمّتْ انسام السِّحرْ
    الرياحين والزهرْ

    شهدوا ليّ عليك يا اخيّة
    جاء القمر سوّاك بريّة
    وباعتزاز بى نبرة حيّة
    صاح في جمعنا يا بريّة
    من يكن من غير خطيّة

    ؟؟؟؟؟؟؟

    وقُمْ رميتِك بالتحية من اللِّي فيّ
    فيا .... وفيّة
    يا معاكي تغيبينا ..
    يا تعالي وابقي جية
    للبعيشو غَصِب عشانِك ...
    والبموتو بحسن نية
    حَارْ علينا بعد طراوة ...
    وبين عيون احباب تقيّة
    نبقى في كتمة وشقاوة
    وبين أرَاذِل
    وارزقيـ….....ـة

    كفاك شكية !!
    كفاك شكية !!
    يا التّشرِّكْ لي غمامك ...
    وتحتَك الانهار قوية
    ما انسرق ذات ليل سنامَك ...
    لو قبيل كُسْتَ الحوية
    كفاك شكية !!
    وما بيضيع حق لا قضية
    لو في طُلاّب من وراهو
    ونية بيضاء وبندقيـ……ـة



    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / محمد الحسن سالم حميد

    مُساهمة  زاهر سر الختم في الجمعة 9 يوليو 2010 - 2:55

    خوفي من تلحق رفيقك



    خوفي من تلحق رفيقك
    يا بريق نجم الحياري
    وانت لا نور طريقك
    لا شرق فجر السهاري
    من زمن يا صحوة طلعك
    غصة في حلقة الصحاري
    حتى شال النم فرعك
    دودى زي وهج البشارة
    قلنا يا سعد المواسم
    عودك المليان جسارة
    عودك الفجر المصادم
    بالبصيرات و البصارة
    يستحيل يرضخ يساوم
    مهما كان الريح حصارا
    يفضل النخل البقاوم
    في السقوط نخل الفقارى
    يا اندلاع صوت الغفاري
    في حلق دغش الغلابة
    لو خريفك تاني يطرح
    آه يا آخر سحابة
    لما يا شرف المواكب
    يبقي هم الناس امارة
    تندحر كل المناصب
    ينكسر كرسي الوزارة
    كنتوا وين . . وين انتو كنتوا
    لما الشوارع ما ثبت قداما مرتق
    نفض الصمت المسافة
    مدت الشوق المضارع
    للصباحات التجرتق
    كف شهيداً بق مارق
    من فرقة الظلمة فجراً
    تم بي دمو الشرافه
    وضم حضن الأرض عاشق
    كنتوا وين . . وين انتو كنتوا
    لما كان في سجنو ثائر
    بي جلابة السونكي نومتو
    ويصحي بي امر العساكر
    قومتو في الزنزانة يمحي
    و يفتح الاف الحناجر
    تجدب الاطفال ويكتب
    انبل الاشعار لباكر
    تشطب السجان وصوتو
    ويبقي فنانا البساسق
    كنتوا وين وين انتو كنت
    لما فضل الدين عباية تدبي
    فوق كتف الغنايا
    تنصب في الجو طوابق
    تنقلب في التو بنوكا
    للبداهن و البنافق و البوافق
    ولما كان نفس العباية
    تتمسخ بي قدره حبلا
    لي قصار عمر الكحايا
    من جنب تنسل سيفا
    لي قصار عمر الكحايا
    من جنب تنسل سيفا
    عبّر السواهو سارق
    شدة الفقر الخرافي
    حدة الشغل اللمافي
    رغم الاف المتاجر
    و الخوازيق و المرافق
    كنتوا وين . . وين انتو كنتو
    لما البيوت في الشمال قامت خنادق
    للكتابات البتنزل فوق ضهاريهم مطارق
    لما طلاب الحقيقة كانو بختارو المشانق
    و لما لسة الله بموت في الجنوب بين البنادق
    كنتوا وين وين انتو كنت
    آه يا وطني المستف في المطارات القصية
    اه يا كفني المنتف في مدرات القضية
    اه يا صمتي المكتف في العبارات الندية
    اه يا نفسي الملطف بالنهارات الصدية
    اه من رفع المصاحف بالرماح الاجنبية
    المعاطف ... أجنبية
    العواطف ... أجنبية
    الجلابيب ... أجنبية
    الدواليب ... أجنبية
    الدهاليز ... أجنبية
    السراير ... أجنبية
    المساير ... أجنبية
    صبة الكاس ... أجنبية
    ختة الراس ... أجنبية
    رشة الدلكة ... أجنبية
    رعشة الفركة ... أجنبية
    طفية النور ... أجنبية
    والخوازيق عربية .. عربية
    فضي نارك يا محار ب ولا هات البندقية
    غني عشقك يا صبية نحن قدامك مدارك
    غني للوطن المفارق
    عشت يا وطني المبرق بالندى ولون المشارق
    يا محرق .. يا مجرب
    عشت بشرف البنادق
    ويسقط العفن البتلب فوقنا من شرف الفنادق


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / محمد الحسن سالم حميد

    مُساهمة  زاهر سر الختم في الأحد 3 أكتوبر 2010 - 17:29

    قلت أندهك...
    خُف من يشِِط الريح
    نديهتى
    على صناقير الشتات..
    ويجهجهك...
    عن جيهتى أبو التى تى
    سنين تبرى الســراب
    ويدهدهك.
    يدخل عليك الليل براك
    أب لمبة بينو يتوهك..
    أو تشــدهك عنى المدن
    فيها السحر والكُضّبُن
    فبها العوارض تنجهك..
    ***************
    تنضب موانى اللقيا..
    تنكبت البحار
    بيناتنا صُن
    أو نتســهك
    وين ساكنيها من الدرر
    واللولى والمرجان..
    خلاص خلت الديار
    من أسمى طائر
    ومن غصن ..
    الطين مكفن بالملح
    كمكام من الصدف المحار
    ما بين حزن
    والتانى ينشكّن حزن
    وأنا يا فنار
    أشــواقى تحتى وفوقى نار
    ما من قطن..
    ما من مواشى ومن صمغ
    لا من عمار..
    وتجى الســفن..
    سيسيق خطايا على الرصيف
    محض إنتظار
    رمض إصطبار
    وهديب سخن
    ما من إشارة ومن قطار
    وتجى البشارة أو الخبار
    ****************
    شــاخن قرى وباخن مدن
    داخ الأديم...
    فتحت جراحو كركّى
    من كتر النزيف..
    أنقنقتن فوق التراب
    كُبّة مواسم من هشيم
    نونن ليالى الصيف خراب
    أضرب عن المطر الخريف
    حردن سحاباتو الأُفق
    نفض السحابات من غلب
    طينا القديم
    هاج غربة فى الطين
    الشجر, رفس النسيم
    قطع الأتر همس العصافير
    الحنون
    وبدت تشـــك
    كل الغصون
    متعففة ومتأففة
    من طيرة خانت جنســها
    وباعت معزة نفســها
    وبرت الصقور المترفة
    شقيش تغور تنضنبه
    وشقيش ترك؟؟؟
    ينجينى من وحل السقوط
    عشقاً سمابك
    ونزّهك
    *****************
    يا بت فى أيام تنتهك...
    حلم الغفارى
    وتســفهك
    شــان إنحيازك للغبش
    حبِّك ضراعو الماب يغش
    عشــقك شــعاعه الوين يخش
    شــايل بشــارات الدغش
    لى أىّ حٍتة بتشبهك
    يا بت دى أ يام من جفا
    بردن كوانى اللقيا
    من بعد الدفا
    خنقت مواعيدى الحشك
    حلق الوفا
    يا أم المساهرين النهار
    ميلك على التحت الكتار
    فوق خلّة قلة بتكرهك
    **************
    وبين مخرج الشــوق من حشايا
    ومدخلك
    كـــــوركتلك...
    ما جانى رد
    خبيت خطابا أستعجلك
    قبل الملك
    غلمانو ما تاخدك ســبية
    وتستبيح لى منزلك
    حاطونى دُقدُق ملتحين
    جاطونى بين ملة وصبر
    كوركتلك
    يا أم السمر
    على المتاريس الحُمُر
    قبل المطاميس توصلك
    كوركتلك
    يا أم الخدر
    تانى وهِلِك
    وين بندقيتك وين ؟؟؟
    صــرخ
    هيكل حمامة على سلك...
    وإنشرا في وادي الزمن
    خلفي الحزن
    شابك ضحك
    دعت الصحاري علي جروف
    فرحي البوار
    غربة وغبن
    صُرمة وحصار
    ظلمة ودوار
    يا قلبي حار
    وابكي ... وابكي
    وين بندقيتك وين ؟؟
    نخج هيكل حمامة على سلك
    ****************************
    أخفيكي ... ولا أوضحك
    إنتِ الموالفة علي الفريق
    لا ليل كلابو بتنبحك
    لا كلمة زي رايش حريق
    تغلط عليك وتجرحك
    يا ولا قبل أول شعاع
    أطفالو تنسابق سراع
    حين تلمحك
    تتموّحك ... كفيك غصن
    تتمرجحك ...
    تصعد إليك
    من راحة إيديك المورقة
    ولي مسرحك
    ويا صارَة في صدرك وفا
    يا قبلة من ثغرك كفى
    تبراك أريجات الزهور
    نسم الأناشيد ينفحك
    ************************
    تديكي أصواته الطيور
    أسقط دموعي وأرشحك
    باسم العرق
    قطر الندى
    خلق الصفق
    طول المدى
    في الهمبريب الجاي حق ...
    غيمة ودعاشها
    أو أرشحك
    فوق حيرتي رأي
    ويفرحك
    يا شارحة صدر البشرحك
    ***************************
    بالطمي من فيض إشتهاي
    أرقوق عناي
    ماروق غُناي
    نبر ورجاي
    حاحاي صُحاي
    أرقد علي قفا
    وعليك
    أعبي سعن الصبور بيكي
    أربي ليكي
    وأجيهك
    بالأربل ... الواسوق ... إيدي
    أمشاط رؤيا ... أسرحك
    بعرق شقايا أريحك
    فوق أنتِ سمحة أسمحك
    برهق لقايا ... أريحك
    تحتار عيون الموية فيك
    يا الله ...
    إلا يشبهك
    شجر الحقيقة الما حصل
    من تالا عارض جهجهك
    وإن دهدهك
    علي أوجهك !!!
    طير العشم فيهو إستراح
    يخفس
    قبل جيت الرياح
    مرسالو يجري ينبهك
    شتلك عن الشدر الكبار
    فيهو الصمغ
    لا يشبهك
    *************************
    وطني ولا ملي بطني
    سكاتي ولا الكلام الني


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / محمد الحسن سالم حميد

    مُساهمة  زاهر سر الختم في الجمعة 8 أكتوبر 2010 - 2:58

    إن رجعت وإيديني فاضي - كلمات حميد

    إن رجعت وإيدني فاضي
    يابا ما راح تبقـي راضي
    والبلــــد ماب تبقي راضي
    ونفسي ماراح تبقي راضي
    والنخــــــــــيل الكان بشابي
    يهش ينادي يصد يقبل مني غادي
    والدروب الكان بتفتح ضفتين
    أحضــــــــــانه نادي
    عليها آها تسب خطايا
    تكب وطيها علي قفايا
    تقوم تعتر لي جوادي
    والقلوب الكان بتفرح
    تكشح الشوق في الأيادي
    جَيتي ليها بلا ابتســامة
    تبقي زي جيت الغمامة
    للأراضي الغبشة فاضي
    يا نخل يا طين سلام
    يا غُلب في المغربية
    لما تتزمر صبية ولا حبوبةً قبيلك
    باركت لي أمي الشهادي
    في التراب الراجي ليّ
    تنقلـــــب بي شق عليّ
    وتنكسر متل القلادي
    يا غُلب لو عُدت فاضي
    للغمت إيدي مـــــوادع
    أو عصر حق الزوادي
    يا بحر مابي الـــزيادي
    يا نخل يا طين ســــلام
    ياضُراع في التقله يكدح
    يا مــــدارس يا حدادي
    يا غبش صر يا غلابة
    يا مقاطيعــن في وادي
    وضالتن ضلت في وادي
    وادي كفرن فيني شعوت
    خيل قراطيسي ومدادي
    من مـــــداين غيمة دافق
    نيل سلام يروي البوادي
    أو يبل ريق أمي يمة
    شوقي جاي أشواقي غادي
    مشتهــــيكن مشتهــيكن
    في ضهاري أيامي يلمع
    في ضــــلامه يبق وشيكم
    وفي خطاوي الناس أفتش
    لو أصادف يوم مشــــيكم
    وحد ما أعاين في عيونن
    ما ألاقى متل عيــــــونكم
    وغربل الألـــوان وحاتكم
    ما لقيت يا يمة لـــونكم
    ما انتو لونكم لون بلدنا
    لون جناينا لون سماها
    لون ترابه و لون نخيله
    لون قماريها وهديله
    وضفتينا الحاضنه نيله
    وبينا هادر زي مسيره
    انتو صوتكم صوت بلدنا
    صوت تواريخه وضميره
    وصرختو الدواية المثيرة
    وباقي زي نار الهجاير
    في حطب غابة الظهيرة
    حس شروقه الفي عروقه
    حس جــــداوله في شتيله
    حس بهايمه في المغارب
    و النسيمات الهميــــــــله
    حس وليداته وغناهن
    فوق عميرن ليله ليله
    يسألو القمر النجميات
    عن شيليله ويا شليله
    يا شليل ما شف بطانه
    هدّ ظلم الدنيا حيله
    يجروا عاجين الشوارع
    وا حليلي ويا حليله
    ياحليلكم بشتهيكم
    انسي وارجع بشتهيكم
    إلا عاد كيفن بجيكم
    وماني شايل الجيت عشانو
    عشانو فارق ضو عينكم
    عايز أقولك بي صــراحة
    من وصّل ما جاتني راحه
    جاري فوق الفوق أفتش
    للشــــغل ما سبت ساحة
    كم برد جا إتغته بيّ
    وكم هجير سواني واحة
    كم شمس صحيته قامت
    ما لقت فردة جناحه
    والرياح بالليل تعافر
    تورت في الذات جراحه
    وكان حبيت العرجاء قالت
    ما ح ترجع لي مراحه
    في بحر ممسوح مأسي
    شاقي تحلم بالمـــراسي
    ما الشــغل يا يمة قاسي
    الفراغ يايمة قاتل
    في انتظار ما عندو رحمه
    وكل شي بيناتو زحمة
    البرد يايمة كافر
    وصيف غريب ماضاقلو نسمة
    وكم بطون أحلامه لقمة
    وكم بيوت أنواره ضلمة
    ياني زيك بينه يودر
    بالو يضهب ضمة ضمة
    يمه يتعب حالو يصعب
    ما المعايش قاسي يمة
    يابا يالكدح المضارع
    يا وتر نغم الطواري
    المـــدن شرقت غناي
    توكت صوت الغفاري
    وأدت أولاد الحرام
    الكرابيج و الإمارة
    ميضنة جامعنا تنقز
    ما تصل كتف العمارة
    يابه من دعت الحضارة والرياح الأجنبية
    في الدروب بالليل حصِّن النفس الأبية
    وأرخي أضانك يابا لي
    ساعة أقولك بى بساطة هنا الشغل داير وساطة
    ومن وسيط قاموسي خالي
    والمكاتب من تشوفني تصفد البابين قبالي
    ما أتملت بي الفيها فاضت ما غريب مالا مالي
    وما ح ارجع يابه لالا لا ح أهاجر إلا تالا
    نجمتين خاتك في باله
    نجمة للخير والجمال والتاني للحق والعدالة
    ما أنت عارف إني حالف
    بالكسالى المو كسالى و بابتهالات العطاله
    بى جريهم في هجاير بقت النار من رماله
    بالبلد بى الشالو شيلن وفي وجيعته قالوا لا لا
    بانتظاركم طول نهاركم شرقة الشمس وزواله
    بالصغار المرة تفتل ومرة تجلب في حباله
    وبالأيادي اليا ما شادت ناقشه عزته بالزباله
    بكنايسنا اليتيمة وكوم جوامعنا الثكالى
    وبي مدارسنا العليهن دقت أجراس الدلالة
    بي جدودنا الماتو ساكت يابه بالضايعين هماله
    بي تميراتن تضاددي لاحيت لا موته شاله
    بي مشاريعنا البتحلم زي عوانس راجية يوم جية رجالا
    بي خضارنا القام مهضلم عينو موية النيل قباله
    بي بكية أختي البترضع والضياع واقف قباله
    بي تويب أمي المفضل خير وشر ساترابو حاله
    بنكرب يا يابه واصبر رغم إنها ماها حاله
    رغم انفك يا عوارض يا تفاهات يا سفالة
    ما ح اركع ما ح اسجد ما ح اعبد للخمالة
    وبنكرب يا انتو واصبر رغم إنها ماها حاله
    وكان حفاير الصبر قلت في الضلوع بحفر لي دالة


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته
    avatar
    زاهر سر الختم

    عدد المساهمات : 638
    نقاط : 851
    تاريخ التسجيل : 26/04/2010

    رد: دفتر الأستاذ / محمد الحسن سالم حميد

    مُساهمة  زاهر سر الختم في الأربعاء 15 ديسمبر 2010 - 8:45

    باسم الحاضر والمستقبل
    ست الدار بت أحمد قالت :
    ليك يا الزين ود حامد شوقنا
    أما بعد ،
    المبعوتة المنك .. وصلت
    ورُح فكيت الطلب الفوقنا
    باقي الدين يا الزين خلصتو
    قدر الفاضل ..
    مصروف راشد والتومات
    والجايات من جاي .. لا جاي
    زي ما قت لك قبال ده
    شهر إتنين حا نطهر راشد
    شهر إتنين المدرسة تأجز
    الله يبعد العارضي تجينا
    وراشد حالف ما يطهر
    إلا أبوهو وعمتو تحضر
    وإلا يجيبو الغنايين
    شان "الشوق" بت سرنا ترقص
    قلنا نجيب المداحين
    طنطن .. أنا جاي من الحج
    وعارف راشد لما يطنطن ..
    كل الدنيا الفيي تطنطن
    غايتو بشر .. بس ربو يهون
    ما كلمتك بالتومات
    أول البارح جني يرطنن
    قالن نحنا الخواجات
    بسم الله .. مرق حصلت
    لقيت لك جعفر زارد البيت بالخواجات
    يبقى حداشر وخواجية
    ناس البلد الكسرو عليهم
    صدو يقلبو في إيديهم
    عدمانين من إسم حكيم
    ولا خبيراً للمشروع
    علماء آثار .. فضلت في آثار
    ما خموها الجونا قبلكن .. شن خلولنا بلا حجار
    الله يصرف الخواجات ..
    الله يصرف الخواجات ..
    الله يصرف الخواجات ..
    بينات جعفر والمحجوب ..
    والمحجوب والخواجات ..
    طقت حجي .. العمدة طفاها
    باقي الناس الجات للفرجي ..
    قنبو قيلو شبعو لحوم ..
    والخواجة يصور ساكت ..
    ستة خرفن وتيس ما كفن
    ستة خرفن في فد يوم ..
    المعدوم أشكال وألوان
    أي خدار في اليوم داك في ..
    كملن رف كمين دكان ..
    أول كفو الخواجات
    بعدو ..
    العمدة وصمد الساقيي..
    ناس المجلس والمشروع
    بعدو ..
    الطلبة وباقي الناس
    حتى الشفع والحروم..
    ستة خرفن وتيس إنصفن
    ستة خرفن في فد يوم
    جات من صالح بت كلتوم
    تسكت تخبز طول اليوم
    لمن حرقت الدولاب
    قنبت المسكينة تدعي :
    الله يصرف الخواجات
    غاية الليلة السقا يشولق
    واطات الله دي ست .. رشاها
    ما في غنوتاً.. ما غناها
    ما في مدحتاً.. ما سواها
    حمارو صبح.. لحق أمات طه
    سب الدين والأمريكان ..
    جنس بدع ..
    زولك ده يحير..
    عند الجد كان أده ينقنق
    عند الفارغة يشيل ويبعزق
    إذكرت كلامك لي ..
    إنو في ناس لاعبين بالدين ..
    وناس لاعبابا الأمريكان ..
    الله يصرف الصرفيكان ..
    الله يصرف الصرفيكان ..
    ما خلوني نشدتك منك
    كيفن حالك والخرتوم
    كيف المصنع والعمال
    حالم لسع نفس الحال ؟
    وما رقوك سووك باشكاتب ؟
    يورينا الله زيادة الراتب
    كيف الناس والحالة عموم ؟
    والعزابة ..الكحيانين
    سيد البيت عل ما زكاكم
    لسع تقعو تقومو براكم ؟
    قلبي معاكم ..
    قلبي معاكم ..
    ربي يخدر عود ضرعاتكم
    بالي معاك يا الزين ود حامد
    بالي هناك والشوق الشوق
    خلى شدير الجوف محروق
    راجي مطيرة الزين ود حامد ..
    نحنا نصاحاً زي واطاتنا
    نحنا نصاح ..
    إلا القراص والتجار..
    والحاصل البحصل كل صباح..
    شتلاتك قبضن
    الحملان كبرن بلحيل
    العضمين الروكة إنزرعن
    اوعك تشفق من تالانا
    ولا نبقالك مشغولية
    زيك واحد .. مستورين
    وما ناسين المسئولية ..
    .. هي يا الزين زغرد
    بت ام زين جابت لها بت
    ستة أولاد حتان البت ..
    المحجوب ينشد من خبرك
    شافعو محسب من يومين
    التومات طيبات ونصاح
    إلا غباش بلحيل آلزين ..
    راشد كرر ..
    شهر اتنين كان ما جيت أنا ما بطهر..
    الله يبعد العارضي تعال..
    كان فد دور يدوك يا تعال ..
    كان بالخصم إن شاء الله تعال ..
    وما تتوصى ..
    وداعة الله ..
    وداعة الله ..
    وداعة الله ..
    أوعى البشغل والعربات..
    والحيكومة السمها فاير

    أم أولادك ست الدار بت أحمد جابر




    ست الدار بت أحمد كيفك
    جاني جوابك مفتوح شارع
    جاني جوابك وانا بتصوّر في ناس راشد والتومات ..
    في الشتلات والحالة عموم
    ناس حلتنا التحت .. الفوق
    الليهم الله وعيشة السوق
    جاني جوابك وانا بتذكر
    في المشروع وعمايل جعفر
    ولما بكيت .. يا ست الدار
    أيوة بكيت .. يا ست الدار
    لما قريت علماء آثار
    علماء إيه يا بت الناس
    سواح إيه .. ما عندك راس
    ست الدار تتوهدبي ليه
    ديلا جماعة السي آي إيه
    تعرفي إيه السي آي إيه ؟؟ !!
    امريكان في كل مكان ..
    ديل مالين الدنيا ملي ..
    ديل قالين الخلق قلي ..
    باسم الدين والأمريكان .. أي عوج مبدي ومختوم
    صوتنا هناك وهنا مكتوم ..
    ومافي فرق في الوقت الراهن بين واشنطن والخرطوم ..
    أنا مأزوم .. مأزوم .. مأزوم ..
    يا خرطوم وينك .. وينك ؟؟ !!
    يا خرطوم شن شبّ وقلبك ؟
    يا خرطوم شن سلبك
    حلبك ؟ وزنجك ؟ وبجتك ؟ ونوبتك ؟ وعربك ؟
    أنا مأزوم .. مأزوم .. مأزوم
    يا خرطوم أزمني الصلبك .. فوق الطلحة الأمريكية
    يا خرطوم .. أوه خرطوم .. أوه واشنطوم
    طن .. طن .. طن .. طن ..
    لفتك فجراً يقطع رحطك ..
    ست الدار سامعاني يا اخيتي ؟؟ !!
    ومرتي وامي وأم الكل .. ؟؟ !!
    أنا بندهلك من شارع الله ..
    فوقي هجير والتحتي بقل ..
    سبي معايا الشردو راجلك .. والحرمونا شوية الضل
    سبي الحالة العالة علينا .. حتى احكيلك بالتفصيل :
    حاصل الحاصل يا بت أحمد
    جاني وفد في المصنع زاير ..
    وكان الوفد ده أمريكاني ..
    لفّ وفات اليوم التاني
    جانا مدير المصنع فاير
    وشو حمار العمدة العاير
    نف (المصنع فيهو خساير
    وقالوا يخفضوا مئتين عامل )
    مئتين عامل في فد مرة
    مائتين عامل .. مائتين عامل
    يبقوا هوامل .. يبقوا هوامل ؟؟
    ما يهموش .. الهم المصنع
    تفّ قراروا وفات في حالو
    مسئولين ونقابيين.. مافي العارض ولا اترجى ..
    العمال من سمعوا احتجوا ...
    سيرو موكب صامد وصامت ..
    إتضامنا معاهم سرنا ..
    أب عرام دور عربيتو .. "العربية الامريكية"
    زنقح خلا الموكب ثابت .
    احتجينا مع الإحتجو
    إتكلمنا كلام موضوعي
    قلنا المصنع حق الدولة .. والعمال أصحاب الحق
    هي البتقرر والتتولى ..
    هي البتحدد سير المصنع
    إيد العامل هي العاد تنتج ..
    ما المكنات الأمريكية
    وزيت العامل ياهو البطلع ..
    مو المكنات الأمريكية ..
    ودرن الأيدي العمالية
    أنضف من لسنات الفجرة
    ودين الدقن الشيطانية
    ومن كرفتة البنك الدولي .. وكل وجوه الراسمالية
    وأشرف منك ..
    داك الحين المصنع هاج
    جات عربات اللات بوليس .. فضوا العالم بالكرباج
    والبمبان الأمريكاني
    شرقت شمس اليوم التاني
    كنا حداشر ونوباوية
    متهمننا بالتخريب والتحريض والشيوعية
    البوليس صاقع شيوعية
    وفاكر نفسو بنبذ فينا
    ..هي آ بوليس أمك مسكينة ..
    البوليس عمدني شيوعي
    التحقيق طلعني مدان ..
    التحقيق طبعاً تحقيقهم .. أو تحقيق الأمريكان
    اسبوعين عشناهن جوه
    اسبوعين زادننا قوة ..
    ست الدار ما تشفقي خالص
    ست الدار أنا ياني الزين ..
    ست الدار سامعاني كويس ؟
    كل الهم.. ما يغشى الغم..
    بيتنا وراشد والتومات ..
    وكل الناس الحالهم شاهد
    ست الدار.. الشوق الواحد
    لي حلتنا ..
    وليكم.. ليكم
    وللإشراق الفي عينيكم ..
    وكل الناس الزولهم صامد ..
    شوق وسلام .
    الزين ود حامد
    ردي سريع .. باليد .. باليد
    في دورين موعود بي شغلة..
    لمت لمت .. كان ما لمت أنا جاييكم وما ندمان





    ( بعد الحاصل والإتحصل ست الدار بت أحمد تكتب ) :
    زيني الزين .. أب حالاً زين ..
    جاني جوابك .. يا المبروك ..
    وسابني أشوف الدنيا كويس
    وأعرف غلط الصاح مظبوط ..
    سابني أميز .. وأقدر أفرز .. أرجع أميز
    فرحانابك يا أحزان ..
    فرح النار بي لوح الزان ..
    ومبسوطابك يا المبسوط .
    ما هزاني مصيرك ..
    قدر ما هزوني الميتين عامل..
    ميتين عامل في فد مرة ..
    ميتين اسرة تروح وين ؟؟ !!
    في الأيام النجسة المرة..
    ميتين عامل ؟؟
    والله مهازل ..
    والله عمايل ..
    يا أوغاد .. وينا نقابة السجم الشوم ؟؟
    وين عمال السكة رماد ؟؟
    وين الطلبة.. ووين الوين ؟؟
    بعتو شفيعكم يا عمال ؟؟
    بعتو وجيعكم للراسمال ؟؟
    وشن راجين يا تعسا الحال
    هاكم دي ..
    والله مهازل
    ميتين عامل ؟
    والله عمايل
    عامل ساكن في آخر الدنيا
    وصل المصنع بآخر بنية..
    ينتج كيف ؟ شغال بي فونيا؟
    عامل ينتج عشرين حتة
    تلحقو منها قيمة إتنين ..
    ستة بغطوا المنصرفات ..
    سبعة.. تمانية .. تسعة بغطوا ..
    أدها تسعة المنصرفات ..
    كل الفايض .. بدخل وين؟
    قولوا البفضل بمشي لي مين؟
    وبرضو خساير؟
    والله مهازل ..
    يا مضغوط .. خفض ميزك حبة تين ..
    تنك القعدة تلاتة خطوط ..
    خفف مرتك توب مضغوط ..
    من التمسحبو كبابي الصين .
    خفض عمرك يا ابن الفانية ..
    وبي نظارتك واجه ثانية ..
    ثانية.. عيون الشغالين ..
    ثانية وبس .
    والله مهازل ..
    ميتين عامل ؟
    ميتين بيت ؟
    ميتين اسرة بلا راس خيط؟
    ميتين اسرة ملوها جراح ..
    مليون اسرة حا تولد صاح ..
    وليكم يوم يا أولاد الهرمة !!
    ليش يا الزين بتوصي عليّا ..؟!
    وانا بت احمد ست الدار ..
    ام اولادك وهم صغار ..
    ام اولادك وهم كبار ؟!
    وياك الزين ود حامد داك ..
    كان متوظف .. ياكا الزين..
    كان متوقف .. ياكا الزين ..
    وليش يا الدخري توصي عليا..؟!
    اسبوعين قضيتن جوه
    يبقى غصب .. زادنك قوة ..
    ليش يا الزين بتوصي عليا ؟!
    ليش يا الدخري توصي عليا ؟!
    وعارف ام راشد والتومات .. مرتاً دغري وغلباوية ؟!
    آه يا الزين .. لو كنت معاكم .. كنت بقيت النوباوية .
    ما تهتم يا الزين بالحاصل ..
    واصل سعيك .. واصل .. واصل ..
    واصل سيرك ..
    كان ما كنت الزين ود حامد كان حا يكونك واحد غيرك ..
    في فضاء فالك يا إنسان ..
    نسمة تقولك في الإمكان ..
    أبدع واحسن من ما كان ..
    ياتو مطرتاً سوت شو .. فرقو غيما الأمريكان ؟!
    ياتو رصاص ما عقبو خلاص ؟!
    ياتو سجن يا الزين ود حامد
    ياتو محن تمحى الإحساس ؟!
    لما يكون في الساس والرأس ؟!
    ياتو وطن يا الزين ود حامد ؟!
    ياتو زمن دام للأنجاس ؟!
    ياتو زمن .. يا الزين ود حامد ؟!
    طه ترابلتو راحو الديش
    غزّا بكانا اتنين رطانة..
    صاقع كلو من اسماعين ..
    هو الفسر لهن الشغلانة ..
    ويا اسماعين :
    ما كان الديش.. شقّ مسيمعك بالجبخانة ..
    لو المجلس قبل اوراقك .. أو في الثانوي لقيت لك خانة .
    لكن قدرك يا إنسان .. بلداً هاص هيصة جبانة..
    طالو الناس التريانين .. ضلو الله الما ضلانا..
    أخّدو" نورة" "الحاج" بالدق ..
    وباكر دور ما خشّ عليها .
    "خاتي اللوم" قطع التمرات الفوق راس بيتو ..
    الخلفاء شكوهو.. وما لقو حق .. ما لقو حق ..
    المحجوب إتلقى اخبارك .. وقال جاييك في أول بص .
    البرسيم طهرنا البارح.
    نعجة راشد صبحت والدي .
    الحيضان سقناهن لوبي ..
    التومات طيبات ونصاح ..
    راشد طيب ..
    وانا طيبين ..
    كل الناس يا الزين طيبين ..
    ينشدو منك في الأفراح ..
    وفي الأتراح .. الزين.. الزين .
    ما تشغل بالك ..
    بس يا الزين كان درت مشورتي ..
    اصلو كتالك.. ياهو كتالك ..
    تجي مندلي ..
    الواطة تراها ..
    وبي جاي جاي .. بندبر حالك ..
    ما الحيكومة الضاقت دمك ..
    عينا محل قبلت .. قبالك ..
    شورتك عندك ..
    .. عندك شورتك ..
    والببقالك .. الببقالك
    التمرات بعناها آ الزين ..
    خفنا السوس .. ونزالة السوق
    مبعوتالك عشرة جنيه ..
    والأشواق من هنا .. لا عندك
    ست الدار أحمد جابر




    تلغرافات :
    تلغرافين في وقت واحد :

    نوري . السوق .. ست الدار بت أحمد جابر
    المحجوب في قطر اليوم
    عفش الزين..
    النوباوية

    الخرطوم .. الخرطوم بحري .. كشك الشعلة .. الزين ود حامد
    راشد راقد.. والواطة .. جعفر طالق فيها بهايمو
    ست الدار بت احمد جابر

    نوري .. السوق .. المحجوب ود أحمد جابر
    كتب الزين .. كل الاوراق .. راشد كيف ؟؟ !!
    النوباوية

    الخرطوم .. الخرطوم بحري .. كشك الشعلة ..
    النوباوية
    أنا في السكة وست الدار ..
    أنا في السكة وست الدار ..
    راشد ود الزين ود حامد


    _________________
    موقع الكاسنجر الجديد

    http://www.alkassinger.com/



    سبحان الله وبحمده عدد خلقه ورضا نفسه وزنة عرشه ومداد كلماته

      الوقت/التاريخ الآن هو الأحد 24 سبتمبر 2017 - 7:32