منتديــــات الكاسنجــــــــــــــــــــــــــــــــــــــــــــر

أهلاً وسهلاً بك في منتديات الكاسنجر
عزيزي الزائر الكريم .. زيارتك شرف لنافي المنتدي ، ولكننا نطمع في تسجيلك معنا


انضم إلى المنتدى ، فالأمر سريع وسهل

منتديــــات الكاسنجــــــــــــــــــــــــــــــــــــــــــــر

أهلاً وسهلاً بك في منتديات الكاسنجر
عزيزي الزائر الكريم .. زيارتك شرف لنافي المنتدي ، ولكننا نطمع في تسجيلك معنا

منتديــــات الكاسنجــــــــــــــــــــــــــــــــــــــــــــر

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

للتواصل بين ابناء الكاسنجر بالداخل والخارج وكل الراغبين


2 مشترك

    حليل خالك.... حليل خالك

    avatar
    ياسر محمد الحسن


    عدد المساهمات : 89
    نقاط : 137
    تاريخ التسجيل : 05/06/2010

    حليل خالك.... حليل خالك Empty حليل خالك.... حليل خالك

    مُساهمة  ياسر محمد الحسن الإثنين 27 سبتمبر 2010 - 16:01

    الإخوه الكرام
    هذه القصيده وصلتني عبر الإيميل وودت المشاركه بها، أرجو أن تنال إعجابكم.

    حــلـيل خــالك ...!

    محمد الجاك الصراف

    الدُّخـْرِى يا ود اختِـى عِـز الدين
    بآكـر تزور بيتنا وتشوف صورتى
    وتقول : حبوبه ديييك صورة مِـنـُو الملصـُوقـَه فى الحيطه ؟ ! ...
    يقولوا ليك : دى صورة خالك آ ولدى ... حليل خالك ! ...
    أكان زولاً بشد الحـيل
    يونسنا وكلامو لذيذ ... عديل بلحيل ....
    كتير الناس تقول مجنون .. وما مجنون ...!
    فى شيتاً جُـوّه فى قلبو يزاول ليهو حَامِى النـوم
    يبـرِّم فى سبيب راسو ويساهر لى هوايد اللـيل
    يقوم من نومو ضربة ديك
    يفوت من بيتو بى ِريقـو زى الضيف
    يشيل مُحْجَانو فى كتفو ..
    وِيطـُـب مُخـْلاتـُو فى باطو..
    وِيفارق الحله مستعجل مع هبة نسايم الصيف
    وحفيان ساى ! .. يبارى القيف
    يضُـرب الغابه وِتـْوَكـَّـر.. يحـِتْ فى ( السـّعَـفـه و العـُـلـّيف )
    يهـز شـدراً فروعـو حديد
    ولمّا العين تكون شافت قريب وبعيد ,
    بهايم الحله تتوجه عشان ما تاكـُل المحتوت ..
    يعاين ليها وِتـْبسم .. وما يحاحيها .. يمشى يفوت
    حشاهُـو ضَـمرْ تقـول عجلاً مكـَدَّن فى الوِتِـد مربوط
    بعد ماتـْغيب يقوم يرجع .. . يجيب نبقـاً تقول ياقوت
    مغـسـَّـل بى دموع الحـُور ..
    معلـّق فى رِقيبة السمحه فى البنوت
    يخـُتـُّـو حداهـُو وِتـْـلـفــّتْ .. وجيهـو حزين ..
    بدل مايقول بدور آكل .. يقول بس نادوا عز الدين
    حليل خالك ... !
    * * * * * * * * * *




    أكان زولاً بريد الجوطه والحفلاتْ
    محل مايسمع النـّقره ,
    يخت طاقيتو فى راسو
    ويشيل طمبورو فى ايدو
    وِيدِجْ حفيان برا نعلات...
    دلاليك العرس داقات ...
    ريحة المحلب المخلوط مع الصندل ...
    حنة ملخوخة فى طاسات..
    ضـريرتاً ماليه خشم ( الحـُق) ...
    وام العريس مشغوله بس بالدخله والمرقه
    وبنات عم العريس واقفات
    يسالمن ديل ... ويعزمن ديل .. ويجاملن ديل ...
    وشايلات جرتقاً ما غـَشْ !
    خرز منضوم مع اللولى ..
    وهلالاً زى هلال شوال .. حرير يلمَعْ !
    زغاريت البنات طاقات ..
    عريس بالفرحه داير انشق ..
    محصن نفسو بى ياسين
    وجايبين ليهو عضم الحوت
    ومالى ضراعو بالحجبات ..
    حجاب جلادو ( ود فراج ) .. غـليد وَاحَمَـرْ ..
    مَـتقــّـله بطنو بالآيات
    وهـاك يا زغبره وْجـُوطه ..
    وناس داخلين وناس مارقين
    وناس قاعدين وناس واقفين
    وناس نايمين وناس صاحيين
    وناس ضاحكين وناس باسمين
    وناس رايقين وناس جايطين
    وضيفاً جا وضيفاً فاتْ ..
    وخالك منسى فى طرف الصريف واقف ..
    لا زولاً يقولـُّو أمش ..
    ولا زولاً يقولـُّـو تعال ..
    دموعو تسيل مطر صابـّات
    طبق طمبورو قبـّـل صاد
    وجاك راجع .. يغنى ليك ..
    غـُنـَاهـُو حزييييين ......
    غـُناياً يبعث الميتين
    حليل خالك ..!
    * * *



    عمار الدنيا مهما زاد , مصيرو زوال
    تـُرُبـْتـَا الـزول تنادِيهـُـو
    وعـُمر الزول تتم ايامُـو مهما طال
    وخالك كان اظن عارف سنينو قلال ..
    وناجع ديما فوق سيقانو ودّر عمـرو بالترحال
    عصاتو (سَلـَم ) .. شرابو سموم
    قـدُرْ ما يزيد عليهو الجـوع , يقـرِّط ( تِكـّـة ) السروال
    دريبو وَعَـرْ مـلان بالشـوك
    كِضِـبْ كان قـالو كـاس لـي نعـال !
    هو خالك خال ؟! ..
    دا من جـِنـُّـو .. يسافر فى الفيافى بَـرَا ..
    وشاغل بالو سك الصيد ..
    مخلى قليبو ناسى ورا ..
    ضلام الدنيا فى عيونو ويفتش لى منابع النور
    لسـانو انسـل ..
    ريقـو فـتيت ..
    وسـاكن ديمه فى العَـتـْمُـور ..
    مشـَرِّك للغـزال بالخيت ..
    وزارع فى الاراضى الـبور ..
    دا قمحان من بنات آدم
    وراجـى يمـوت يهاجـر لى بنات الحـور ..
    حـليل خـالك ..!
    * * * * * * * * * *

    وآآآآخــر عـمرو يا ولـدى ..
    مرض مرضـاً ..!
    مرض مرضـاً ..!
    مرض مرضـاً ..!
    .. رقد خـالك تلاته سـنين ..
    وكـُلّ الشافتو تسكلج ..
    تقـول : كـُـر.. كـُـر .. دا ما بـِحيَا .. !
    ومـلك يامـين يقـول يامـييين ..!
    كتير البطـّـل الشغله وقعد حرسو ..
    يشـهدو فـيهو بالتلـقين
    وكم كم مره جـبنا المـويه فى القـرعه
    عشـان ما نـْغـَـمـِّد العـينين
    ومـاتن تب اديـَّاتـُو
    جـلد ملصـوق على عضـامو
    وْحَـطب مدّاهِـن الكـُرعـين



    وجبنا (حَنـُوطنـَا ) للتجهيز
    بقينا نعد ضليعاتو
    ونقول : يا الروح سكونك وين ؟!
    لقينا الروح تطق مسجونه فى الحلقوم
    مربـّطه بى سلاسل (كـُنْ )..
    وطايعه الواحد القيوم ..
    تقول : يارب ..
    متين امرق .. متين امرق .. متين امرق
    ونحن قعدنا فى ( الدلجه ) وحرسنا (ايوب)
    شهور وشهور ... بقينا ( سُـقـُد )
    وما ضاقت عيونـَّا النوم ..
    وكل الحله منكسره ومجاملانا :
    ناس ( التايه بت منشار)
    وبت حمدون
    بنات طه .. وبنات التوم
    واخوات كمال الدين ..
    عمتك كلتوم
    وبت حاج احمد ( السـُرّه )
    وبنات طيبه
    وبخيته الرايقه بت جادين ..
    دموعن بلــَّنْ الواطا .. وتيابـِن جَرْجَرَنْ دمـُّـور ..
    وحزنانين على خالك ..
    عشان خالك قليبو حنين ..
    وشال فى كتفو هم الناس ..
    يشيل ويردُم
    يشـيل ويردُم
    ويدس فى همـو فى قلـبو
    ويقاسى براهو حر النار
    دا شيتاً مابْـتشوفو العين
    وهمـُّـو كِـتِرْ ..
    وقلبو انقد يوم العيد
    وخالك مات ..
    مـات ماضـاق العـديل والـزين ..
    حـليل خـالك ..
    حـليل خـالك يا عـزالدين ..!!
    * * *
    زاهر سر الختم
    زاهر سر الختم


    عدد المساهمات : 638
    نقاط : 851
    تاريخ التسجيل : 26/04/2010

    حليل خالك.... حليل خالك Empty رد: حليل خالك.... حليل خالك

    مُساهمة  زاهر سر الختم الثلاثاء 28 سبتمبر 2010 - 14:37

    شكراً ياسر والتحية لهذا الخال أخو الحسين وعم عبد الرحيم وكل الشخصيات النادرة من ذلك الزمن الجميل

    ولكن لمن هذه القصيدة ... وعز الدين دا منو ... وبعدين حكاية عضم الحوت دي شنو ؟؟؟

    يجيب نبقـاً تقول ياقوت
    مغـسـَّـل بى دموع الحـُور ..
    الاخ / حسين
    الحاصل شنو عندكم في هجليج


    دا قمحان من بنات آدم
    وراجـى يمـوت يهاجـر لى بنات الحـور ..

    الزول دا عبدو الشيخ والا شنو ؟
    avatar
    ياسر محمد الحسن


    عدد المساهمات : 89
    نقاط : 137
    تاريخ التسجيل : 05/06/2010

    حليل خالك.... حليل خالك Empty رد: حليل خالك.... حليل خالك

    مُساهمة  ياسر محمد الحسن الثلاثاء 28 سبتمبر 2010 - 16:34


    شكراً الأخ زاهر على مرورك الطيب

    هذه القصيده لشيخ شعراء الحلمنتيش محمد الجاك الصراف المعروف بإسم (المتشعلق بن المنبرش) من منطقة المسيكتاب شمال شندي.

    و عز الدين هذا هو ود اخت هذا الخال العجيب الذي يريدالهجره لي بنات الحور.

    و بيني وبينك الدايرين يهاجروا لي بنات الحور كتار..

    ناس عبدو الشيخ

    و ناس الصادق حسن خليفه

    واللسته طويله..

    و بالتأكيد شيخ سفيان أوّل اللسته (شيخ الجماعه القنعانين من بنات آدم) لكن الأيام دي انا متفائل و شايفو ماشي للأحسن..

    كن جميلاً ترى الوجود جميلاً.

    لكم التحايا جميعاً و دمتم بعافيه.




      مواضيع مماثلة

      -

      الوقت/التاريخ الآن هو الخميس 28 مارس 2024 - 5:41