منتديــــات الكاسنجــــــــــــــــــــــــــــــــــــــــــــر

أهلاً وسهلاً بك في منتديات الكاسنجر
عزيزي الزائر الكريم .. زيارتك شرف لنافي المنتدي ، ولكننا نطمع في تسجيلك معنا


انضم إلى المنتدى ، فالأمر سريع وسهل

منتديــــات الكاسنجــــــــــــــــــــــــــــــــــــــــــــر

أهلاً وسهلاً بك في منتديات الكاسنجر
عزيزي الزائر الكريم .. زيارتك شرف لنافي المنتدي ، ولكننا نطمع في تسجيلك معنا

منتديــــات الكاسنجــــــــــــــــــــــــــــــــــــــــــــر

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

للتواصل بين ابناء الكاسنجر بالداخل والخارج وكل الراغبين


3 مشترك

    لكل اخر عنقود (الحتالي)

    ابوالقاسم سيداحمد
    ابوالقاسم سيداحمد


    عدد المساهمات : 14
    نقاط : 34
    تاريخ التسجيل : 23/12/2010

    لكل اخر عنقود (الحتالي) Empty لكل اخر عنقود (الحتالي)

    مُساهمة  ابوالقاسم سيداحمد السبت 25 ديسمبر 2010 - 5:03


    هوى يا وليد يا دلوعة يا مرنوعة
    أعدل إيدك المفدوعة
    واتلحلح واقيف دغرى وواس صدرك
    مع صدرى واتشدّع
    ليك الحق
    شان ولدوك فوق اسفنج
    و أول جديد سوهو ليك بالبنج
    وهسع هوايتك إنك تلعب البنق بونق
    وليك الحق عشان فطموك بعد مازدتا فوق سنتين
    وفى سن عشرة نومك كان على الليدين
    غطاك بالشاش وفرشك بحرير الصين
    والبتدورو كلو بتلقى غاب قوسين
    ابوك مليان وجيبو سمين وقلبو سمين
    وفاتحلك حساب فى البنك والتأمين

    وليك الحق
    عشان ما خضتا فى وحل المطر والطين
    ومن الترعة ما سويت شراب الهين
    وما قيلتا فى ضل دومة بى فرعين
    وما شاققتا عرق النيل مع الوزين
    وليك الحق
    عشان ادمنتا عيشة اللين
    مشي الاسفلت ما جربتو بالكرعين
    ركوب اللورى فى شمساً تصر العين
    وما عانيت وقوف الصف وراء التموين
    عشان يا انتى ما بتدرى سجل ابواتك البدرى
    دحين اسمع .. أقيف واسمع
    سماك الباكى مجدو الزال
    يا ما كانوا تحتوا رجال
    ابوخنجر وابوشوتال
    والصقر البجيك خوجال
    صوتن كان يمين جلجال
    ومكسيين كمال وجلال
    لكن الزمن اسرع
    سيفن بلحس الفقره
    وما كان برضو بالحقرة
    وكانوا بضبحوا الشقره
    وكانوا بضوقو العادوه نوم الكوع
    وكانوا بموتوا فى شان حرمة المفزوع

    الجعلى اب شرابا حار وقالوا بعدى يومو خنق
    والشايقى البياكل النار وفوقو نحاسو متخنق
    ودرفون البجا الصقار حاقب سيفوا ياكل الشق
    والغرباوى عينو شرار وكضب القال عندو عرق
    والنيلى البعرفوا كتار على كتل الأسود جرّق
    والبطحانى والشكرى وغيرهم من أهل فخرى
    ومنهم أصلى لا بشبع ولا بقنع

    هوي يا وليد
    وفى سن عشرة نومك كان على الليدين
    غطاك بالشاش وفرشك بحرير الصين
    والبتدورو كلو بتلقى غاب قوسين
    ابوك مليان وجيبو سمين وقلبو سمين
    وفاتحلك حساب فى البنك والتأمين

    وليك الحق
    عشان ما خضتا فى وحل المطر والطين
    ومن الترعة ما سويت شراب الهين
    وما قيلتا فى ضل دومة بى فرعين
    وما شاققتا عرق النيل مع الوزين
    وما عانيت وقوف الصف وراء التموين


    الجعلى اب شرابا حار وقالوا بعدى يومو خنق
    والشايقى البياكل النار وفوقو نحاسو متخنق
    ودرفون البجا الصقار حاقب سيفوا ياكل الشق
    والغرباوى عينو شرار وكضب القال عندو عرق
    والنيلى البعرفوا كتار على كتل الأسود جرّق
    والبطحانى والشكرى وغيرهم من أهل فخرى
    ومنهم أصلى لا بشبع ولا بقنع

    ود ابن ادم المسكين نجاتو تحت قرون التور
    والعوتيب يجيك يجرى يشيلك وانتى ما بتدرى
    وما بيرفع

    هوى يا وليد ...
    حصل سادرتا بالديداب
    وقدامك مراحك وراكب الخباب
    ودربك طولوا يملا العين
    سحاب وغبار ومويتو سراب
    وهوى كرباجك البكاى
    يبكى على ضهور الضمر الانجاب
    وتسرى الليل وما تضوق هجدة
    لو كان النجم ما غاب
    وبعد أيام تجيك لفته
    ويلوحلك فى البوادى سحاب
    وتكرف من دعاش العينة تملا رئاك
    عطر وأطياب
    تلقى الوادى خضر زى تقول
    ماكان خراب ويباب
    وبت ام ساق تقييل من ضحاها
    على المعالى ونسمة الهباب
    وتفرش ليك حزمة نال تحت
    سيالة تريانة فروعها قراب
    وتنفخ كل آهاتك مع المزمار
    تصوغ الحان ملانة شباب
    وتنسي الدنيا كل الدنيا
    ماعندك معاها حساب
    خلاف برقا يشيل حرقاص
    أو رعدا تقول رصاص وكت فركع

    وتلقى هناك بنات بلدك ولاد بلدك
    يعلو الصفقة تقدح فى القلوب الشوق
    ونغم الفال ابشرن يا بنات بالخير
    والجنيات تطير لا فوق
    وكم زغرودة تتفجر تفور بالناس بعد ما تروق
    يعوم الوز صدورو تشابى للمجهول وما بتضوق
    تميل زينوبة زى البان يمين وشمال تودى الطوق
    واخوان ام شلخ ينكبو جوه الداره
    زى صقرا نزل من فوق
    ضرب الصوت والركزة بيفرق الناس


    ومشيت المركب الغرقاني بين موجتين
    طفروا منها النواتا بطن اللجّة قالوا اخير
    تماسيحاً يقالدوا الموج يصارعوا
    عتاوة العرق الكتالو مرير
    ديل يا وليد ولاد النيل
    نهرتوا يمين تسوى الفاق
    ومراً أصلاً لا ضاقوه لا بنضاق
    كفاك يا وليد بلاش فاقة
    خلاص أنا تهتا فى الاشواق وما برجع
    وهسع ضمة لا شايفك ولا بسمع
    .
    مع تحياتي واشواقي
    سامي عثمان
    سامي عثمان


    عدد المساهمات : 72
    نقاط : 132
    تاريخ التسجيل : 07/12/2010

    لكل اخر عنقود (الحتالي) Empty رد: لكل اخر عنقود (الحتالي)

    مُساهمة  سامي عثمان السبت 25 ديسمبر 2010 - 9:08

    شكرا قاسم والتحيه لكل (حتالي ) في هذا المنتدي ...
    عبدو الشيخ
    عبدو الشيخ


    عدد المساهمات : 380
    نقاط : 594
    تاريخ التسجيل : 25/05/2010
    العمر : 43

    لكل اخر عنقود (الحتالي) Empty رد: لكل اخر عنقود (الحتالي)

    مُساهمة  عبدو الشيخ الأربعاء 29 ديسمبر 2010 - 6:37


    الحمدُ لله انا ما حتالى ...
    سامي عثمان
    سامي عثمان


    عدد المساهمات : 72
    نقاط : 132
    تاريخ التسجيل : 07/12/2010

    لكل اخر عنقود (الحتالي) Empty رد: لكل اخر عنقود (الحتالي)

    مُساهمة  سامي عثمان الأربعاء 29 ديسمبر 2010 - 16:01

    شنو ياهندسه الجاب سيرتك منو ذكرتني تلك التي تانس جارتها يوما في المطبخ وكلما تسنح لها فرصه تسرق ليها معلقه أو ماشابه وفي أحد الايام وخلال الونسه وهي تطبخ في حلتها قامت المره سألت هي كمشتي وينا .؟ قامت ردت علي الفور والله ما شلتها.!

      الوقت/التاريخ الآن هو الخميس 28 مارس 2024 - 20:41