منتديــــات الكاسنجــــــــــــــــــــــــــــــــــــــــــــر

أهلاً وسهلاً بك في منتديات الكاسنجر
عزيزي الزائر الكريم .. زيارتك شرف لنافي المنتدي ، ولكننا نطمع في تسجيلك معنا

للتواصل بين ابناء الكاسنجر بالداخل والخارج وكل الراغبين


    شوايقة يارسول الله

    شاطر
    avatar
    مرتضى خليفة

    عدد المساهمات : 175
    نقاط : 289
    تاريخ التسجيل : 11/05/2010

    شوايقة يارسول الله

    مُساهمة  مرتضى خليفة في الثلاثاء 27 يوليو 2010 - 6:25

    ادروب سألو تمش الجنة والا النار قال ليهم الشوايقة ماشين وين ؟؟ قالو ليهو ماشين النار قال خلاس بامش معاهم النار يا ادروب الكلام ده كيييف بس؟؟ قال ليهم: الشوايقة ديل ما بمشو حتة الا يكون فيها كّدة ولا منفعة .

    شايقي لقو بدق في اولاده الاتنين - سالو مااالك - قال لقيتهم فاتحين المروحة في تلاتة وهم كلهم اتنين بسسس .


    شايقي دخل مع ابليس في جمعية . . . شال الصرفة الاولى وقال بسم الله


    شايقية عجوز في محو الأمية.... سألتها المدرسة: قولي لي جملة فيها إدغام بغنة ؟
    قالت ليها : عمن يعميك

    جعلي سألُوهو عن الغُربه كيف
    قال والله الغربه شِدة ما حاره
    تلاقي الشايقي في الشارِع تسلِم عليهو


    شايقى قروشو وقعت منو بالبلكونه وقت نزل ما لقاها عارفين ليه لانو وصل قبلها.......!




    واحد شايقي جاتو ليلة القدر قالو ليه اي حاجة دايرة بتتحقق ليك بشرط انه الجعلي جارك تتحقق ليه نفس الحاجة مرتين قال ليهم قدو لي عيني.


    شايقي لقوه بمسح صدره بي ورقة فئة 5جنيه سألوه ليه قال ليهم الدكتور قال لي اشتري زيت سمسم اشربه واتمسح بالباقي.


    شايقي نذر لو جاله ولد يصوم خمسة ايام شكر لله ، بعد ايام الولد مات ، صاحبنا راح خاصمهم من رمضان.


    واحد شايقي ابوه مات قالو ليه.....ادي الشيخ الغسل ابوك 10 الف قال ليهم ....ليه هو غسل Bmw.



    عسكري شايقي لقي جعلي مقتول ما عرف القتله منوسجل القضيه علي فاعل خير.


    شايقي قال لابوه : ابوي عايز اكمل دراستي بره . . ابوه قال ليهو مافي مشكلة خلي امك تفرش ليك السرير في الحوش بس اوعى البرد ما يطقك

    امام شايقي في الركعة الاخيرة سمع واحد جاي يحصل الركعة ، سلم واقف .


    شايق مشى يسجل ولده في المدرسة قالوا ليهو : المدرسة بي خمسمائة جنيه والبص بثلاثين جنيه ، قال ليهم خلاص سجلوهو لي في البص.


    شايقي كتب في وصيتو ادفنوني جنب الجعلي . لمن سالوه ليه قلت كدا ؟ قال عشان يوم القيامة الجعلي بيقول حرَم الحساب علي.


    شايقية فتحت جواز راجلها لقت مكتوب مهنته رجل اعمال ، قامت مسحت اعمال وكتبت عوضية.


    داير تعذب شايقى قطع قروش قداموا.


    شـايـقى واقـــف في بص شـاف بنت قـاعـــدة قـام عاين ليها .
    عــاينت ليه أبتـــسم ليها أبتســمت ليه غمـــز ليها . غمــزت ليه.
    أشـــــر ليها علي المحطة نزلت . . . قعـد محلــــــــــــــها !!!

    شايقي داير ينزل نعي في الجريدة .. كتب :
    الشايقي ينعي ابوه ... ويوجد تمر للبيع .



    شايقي دخل الجنه وفجاه اختفي ...!
    لما فتشوه لقوه بكب في بنزين لي ناس النار


    شايقي الحريقه قامت فى بيتو عمل مس كول للمطافى.


    شايقى إتصل فيه جورج قرداحي قاليهوا : صديقك ميرغنى الجعلي يبي مساعدتك رد عليه الشايقى وقال قولو نايم
    avatar
    محمد مدنى سيداحمد

    عدد المساهمات : 87
    نقاط : 129
    تاريخ التسجيل : 23/05/2010

    رد: شوايقة يارسول الله

    مُساهمة  محمد مدنى سيداحمد في الثلاثاء 27 يوليو 2010 - 7:16

    رباطابيات!




    -------------------------------------------------------------------

    واحد رباطابى معزوم عشاء مع واحد صاحبو مشى لقى الكهرباء قاطعة قعدو يتونسو مسافة الرباطابى جاع جوعه شديدة قال لى صاحبو ياخى الزمن فات وانا جيعان ياخى طلع لينا العشاء دا، صاحبو قال لية ياخى العشاء ما بطلع الا الكهرباء تجى.... الرباطابى قال لى اصلو دا عشاء ولا شريط فيديو!!
    ------------------------------------------------------------------

    شافعة رباطابية قاعدة تاكل مع أبوها في الصينية ، قالت ليهو: يابا أدني عيشة، أبوها حب يشاغلها، قال ليها بتدوري بيها شنو؟؟ قالت ليهو بدور أرضعها!!!
    ------------------------------------------------------------------

    رباطاب عندهم بنطون عطلان وقاعدين طول النهار بيعافروا عشان يطلعو البنطون من البحرعشان يصلحو.. جا واحد جعلي قال ليهم: انتو البنطون دا مطلعنوا من البحر ليه؟
    رد عليه واحد منهم: والله البحر ما نفع معاهو قلنا نجرب الظلط..
    ----------------------------------------------------------------

    رباطابي عسكري مرور .. بلغوه أنو في باص إنقلب .. مشى مكان الحادث لقى الناس كلها ميتين ماعدا واحد .. قال ليهو : أها يالصـــــندوق الأســـــود .. الحادث حصل كيف ..
    ------------------------------------------------------------------

    رباطابي بتاع فرن جاءهو واحد قال ليهو العيش في النار رد ليهولا يااخوي في الجنة ..
    ------------------------------------------------------------------

    رباطابي جاهو شايقي من السفر قال ليه ارح وريني قبر امي
    الرباطابي مشى معاهو المقابر وقال للشايقي اها ده قبر امك
    الشايقي قال ليه حددو لي بالضبط ياخي ده ولا ده؟؟
    الرباطابي قال ليه يا زول شيل فاتحتك ساي ..اصلك انت داير تديها مصاريف؟؟

    ------------------------------------------------------------------

    رباطابي راكب القطر بتاع الشمالية ...وعشان مافي نور عفص رجل واحد جنوبي ... الجنوبي بي زهج قال ليو : انت عميان ولا شنو تطلع في كراع بتاع الناس انت ما عارف زاتو ماشي وين...الرباطابي رد عليه : انا ماشي عند اهلي انت ماشى وين ..
    ------------------------------------------------------------------

    رباطابي لابس جزمة قديمة أصابعينو الخمسة مارقين بره. مشى لبتاع ورنيش مد ليهو كراعو.
    بتاع الورنيش قال ليهو: أورنش ليك؟ قال ليه : لا لا.. طقطقم لي!!

    ------------------------------------------------------------------

    رباطابي جزار جاو واحد قال ليهو عايز راس نيفة بس صلحو كويس
    قال ليه اصلحو كيف يعني البسو نضارة
    ------------------------------------------------------------------

    رباطابي ببيع لبن المهم عندو زبون محامي مرتو غالطت الرباطابي في حق يومين بحجة انو كان في مطرة والرباطابي مصر انو اداهم اللبن في اليوم البعدو جا زوجها المحامي وقال ليهو انحنا ماممكن تغالطنا ابدا الرباطابي قال ليه اغالطك كيف وانت الغلاط فاتح ليه مكتب

    ------------------------------------------------------------------

    رباطابي في عزومة عرس لاحظ انو في زول نائم نومة عميقة جدا ... بس في اللحظة الختو صينية الاكل عمك تترب صحي وابتداء يلقلق ... الرباطابي قال ليهم : انتو زولكم دا كنتو خاتنو في الشاحن ...

    ------------------------------------------------------------------

    رباطابي مشى لواحد بعمل في لقيمات في المحطة داك كلما يخت الصاج في الكانون الصاج يميل لي جمبه الرباطابي قال ليه بتظبتوا في الدش عايز تجيب ياتوا قناة فضائية؟
    صاحبنا لمن رمى العجينة في الصاج والزيت كان سخن العجينة بعد ما نزلت في آخر الصاج عملت صوت (تششش) الرباطابي قال ليه اكيد دي قناة الجزيرة زولنا طوالي طفى الصاج ومشى بيتهم.

    ------------------------------------------------------------------

    رباطابية بتبيع زلابية وطعمية للركاب في محطة ابوحمد بعدين الايام ديك شغلو القطر الاكسبرس وكان ما بيقيف في اي محطة المهم القطر جا ماشي فيها فووووو وماباعت اي حاجة وقامت رجعت البيت قام راجلها قال ليها انشاء الله بعتي كويس الليلة؟؟
    قالت ليهو- ابيع كيف والقطر جا ماشي فيني زي ترجمة الفلم الاجنبي
    ------------------------------------------------------------------

    الرباطابي عمل ليه محل فول في البلد ومشى معاه كويس قام وسع المحل وعمل قدرة ثانية وزاد عدد الكراسي وبعد فترة جاب ليه ست شاي في المحل جاه صاحبه الرباطابي قال ليه يا دكتور عينت ليك (فحيص) معاك ولا شنو!!

    -----------------------------------------------------------------

    رباطابى عمل شكله بالليل واتفلق ابوهو وداهو للدكتور والدكتور كان طالع عاين للولد لقا الجرح كبير
    قال لي ابوهو ولدك دا كان تجيبو بدري
    ابو الولد قال ليهو بدرى كيف يعنى كان اجيبو ليك قبل مايفلقو

    ------------------------------------------------------------------

    شايقية ورباطابية راكبات الحافلة ماشات بكا .. الشايقية طقطقت للكمساري ونزلت، الرباطابية اتأخرت.. الكمساري قال ليها: نازلة؟ قالت ليه : لا.. لا.. بدور اقدمها للباب!!

    ------------------------------------------------------------------

    واحد رباطابي راكب القطر قاعد جنب الشباك ... فطلب منو الزول القاعد جنبو : ممكن اقعد جنب الشباك عشان انا بسف السـعوط وبتف ...الربطابي رد عليو : نان وانا بسف وببلعو ..

    ------------------------------------------------------------------

    رباطابى نزل ضيف عند جماعة وكان عندهم تيس فى الزريبة جنب الصالون عنده نزلة الليل كله يعطس...الصباح بدرى سيد البيت جا وسال الرباطابى" ان شاء الله نمت كويس؟؟ الرباطابى قال ليه
    انوم بى وين لى تيسك ده التقول مكوجى مقابل العيد

    ------------------------------------------------------------------

    واحدة حنكوشة دخلت مطعم قراصة صاحبو رباطابى .. قالت ليه ياعمو عليك الله ادينى سندوتش
    قاليها يابتى عندنا قراصة كان دايرة سندوتش جيبى ابرة وخيط

    ------------------------------------------------------------------

    رباطابي شاف عتود اسود واضنينو بيض قال مالو دا عامل زي البنطلون القالبين جيوبو

    ------------------------------------------------------------------

    الحاجة جات للدكتور الرباطابي في المركز الصحي وقالت ليهو
    دايراك تحولني المستشفى عشان هناك بكشفو علي بالسماعة .
    قال ليها نان الشايفاها مدروعة في رقبتي دي قايلاها نبلة؟؟
    ------------------------------------------------------------------

    رباطابي جارو عندو غنماية عايز يبيعا
    بعدين في السوق الغنماية قربت تزوووغ قام رفع ليها ولدا عشان تشوفو جات راجعه
    والرباطابي مصور الموقف كلة قام قال ليه
    اسمع ياصحبي جبتها بالريمووووووت

    ------------------------------------------------------------------

    شايقي جاء لرباطابي قال ليه انا بقيت شاعر وقام قرأ ليه
    ما بين الشتاء والفواصل حبك سكن المفاصل الرباطابي قال ليه
    انت ما شاعر انت عندك رطوبة امشى اكشف
    ------------------------------------------------------------------

    رباطابي مره بي جماعه من اهلنا الهدندوة بشربو في قهوة
    وكانوا لابسين لبستم المعروفة الواحد يكون لابس سروال طويل
    وباقي جسمو عريان ورابط العمه خلف خلاف
    الرباطابي قاليهم يا اخوانا داير لي فنجان جبنة
    نط واحد من الهدندوة قاليهو ياخي انتو سحارين ما بنديك
    الرباطابي قاليهو عليك الله انت هسي يسحرو ليك شنو زي الفانوس القزازتو مكسرة

    ------------------------------------------------------------------

    في واحد رباطابي جيـنو شراب ..وجارو أنصار سنة ... مشى ليهو ينصحوا وشبكو ليك: الخمرة دي بتودر العقل .. الخمرة دي بتعمل ليك تليف في الكبد يعني بالعربي كدا الخمر دي يعني ( موت بطيييييء ) ..
    الرباطابي اتلفت وقال ليهو: ( أنا زاتي ما مستعجل ) !!!!!

    ------------------------------------------------------------------

    قالوا رباطابي قاعد في مطعم وجنبو زول احوص, الرباطابي طالب كباب والجنبو طالب فول, اها قام الجنبو كل شوية ياكل من الكباب بتاعو "نظام احوص وكدة". الرباطابي اتغاظ شديد قام قال ليهو : عرفناك ما بتشوف, ما بتضوق؟؟؟؟
    ------------------------------------------------------------------

    واحد قال لرباطابى انتوا عليكم الله عندكم موية ...
    الرباطابى قال ليهو طيب الشجر العندنا داااك قام بالتيمم ...
    ------------------------------------------------------------------

    رباطابى في قربة جارهم تعب شايلنوا مودينو المستشفى ركب معاهم فى العربية الرباطابي ساكت ساى بعاين للمريض والمريض ماعاوز يدى اى اقوال ولا كلمة اول ماجاء في شارع المطار قامت العربية دقدقت قام المريض قال نحنا وين؟؟ الرباطابي قال ليهم
    ( زولكم يادوب خش الشبكة )
    -----------------------------

    شافع رباطابي شايلو جردقة في صينية بيعرضها للبيع عند محطة قطار أبوحمد ، شايقية راكبة القطر مدت راسا قالت ليهو ها جني الجردقه بي كم ، الشافع رفع راسو وقال بالفين ، ردت الشايقة كيفن بالفين مي وطي ، رد الشافع تطي العقرب وكت وطي ما تنزلي تخمي.
    avatar
    سهام السر

    عدد المساهمات : 83
    نقاط : 125
    تاريخ التسجيل : 15/05/2010

    رد: شوايقة يارسول الله

    مُساهمة  سهام السر في السبت 31 يوليو 2010 - 13:03


    ‏ مشكــــــــــــورين

    ‏ علي هذه

    ‏ الاستــــــــــــراحه

    ‏ ويديــــــــــــكم

    ‏ العافيه

    دروغبا

    عدد المساهمات : 3
    نقاط : 5
    تاريخ التسجيل : 12/08/2010

    رد: شوايقة يارسول الله

    مُساهمة  دروغبا في الخميس 19 أغسطس 2010 - 5:40

    مشكرين ياود المدنى ياابو الثلاث بنات
    avatar
    أمير الماحي البقاري

    عدد المساهمات : 18
    نقاط : 22
    تاريخ التسجيل : 29/07/2010

    شايقية أهل العز والكرم

    مُساهمة  أمير الماحي البقاري في الخميس 26 أغسطس 2010 - 3:07

    يا أخوي يا مرتضى
    مالك علينا
    والله نحنا الكلام في الشايقية ده بقطع قلوبنا وما بنرضاهو
    لأني أعلم يقيناً بأن الشايقية من أعز الناس ومن أحسن ما يتبع أصول الكرم والضيافة والجيرة
    وكلام الناس التانية عن الشايقية ما هو إلا عبارة عن غيرة وحسد شديد لأن الشايقية أكثر قبيلة متعلمة
    أكثر قبيلة فيها المفاصل المؤثرة في البلد والدولة .
    وما تكثر أقيف هنا، ولا أوعى تكون ماك شايقي غايتو الشيء العارفو ناس الكاسنجر معظمهم بيقول نحنا جعلية؟
    ناكرننا عديل ما لكم!!!
    الحاصل شنو؟
    avatar
    مرتضى خليفة

    عدد المساهمات : 175
    نقاط : 289
    تاريخ التسجيل : 11/05/2010

    رد: شوايقة يارسول الله

    مُساهمة  مرتضى خليفة في الخميس 26 أغسطس 2010 - 5:46

    امير تحياتى ورمضان كريم ،،، الموضوع لايعدو أن يكون ونسة ونحن الشوايقة من كتر ثقتنا واعتزازنا بانفسنا بنحكى النكات البتتقال عننا ونضحك ونتونس بيها ومابنشوف تهكم وسخرية الناس فينا غير ونسة سااااكت والما تلحقو جدعو اما حكاية الجعليين دى نحن جدنا حاج الخليفة جعلى لكن بمجرد وصولو الكاسنجر اتشلخ وبقى شايقى أصلى
    avatar
    أمير الماحي البقاري

    عدد المساهمات : 18
    نقاط : 22
    تاريخ التسجيل : 29/07/2010

    ديل أهلي

    مُساهمة  أمير الماحي البقاري في الأحد 29 أغسطس 2010 - 3:59

    العزيز مرتضى
    أها شفت معظم الكاسنجر بتقول أنها جعلية وما أظن الشايقية في الكاسنجر إلا أولاد عمنا العوناب العندكم!!!
    ولا شنو؟؟
    الباقين كلهم قالوا جعلية .
    عموماً ديل أهلي وكان ما جيت من ناس ديل وأ أسفاي وأ ماساتي وأزلي.
    الله يرحم إسماعيل حسن.

    أنا المشكلة يا مرتضى ساكن لي وسط شلة من منطقة شندي وجنوبها بالشرق والغرب من عطبرة وحتى المتمة وأنت نازل بالشرق والغرب حتى حجر العسل وحجر الطير.
    وكلهم شغالين لينا شغل شديد الشايقية ما عارف الشايقة بتاعين مشاكل الشايقية فقر الشايقية جبارين الشايقية مسلطين وما أدارك، ونحنا جعلية ماتعرف ونحنا اولاد قبائل ما تعرف لمن جابوا كثافتي.
    الكلام لمن حرقني بحثت ليك وراهم والله يا مرتضى معظمهم اللقيتو حساني والقيتو هواري والقيتو انقريابي واللقيتو من العرب المعندهم حتى أصل ودورت ليك فيهم زول بيفتح خشمو هسع مافي.
    بس يا زول أنت من وين بيقول أنا من كدة طيب جعلية من وين في الجعلية تجيك التعتعة والتمتمة لما أقرص وأوريهو أنو أنا عارف مفاصل الجعلية وأحد ورا التاني الزول بيقع.
    عموماً الشيء الجميل في الحكاية الجعلية أولاد عمنا وطبعاً بتنازع معاهم في الهزل الهزار زي ما أنتم بتشاغلوا ناس الصعادة وهم بشاغلوكم بي ناس الطرف وكما أهلنا في الفاناب والكوع والجزائر. يعني لا يعدو الأمر مزاح والأصل من وراء واحد كان ما عندك فيهم عم بيكون عندك فيهم خال.
    الجميل لقيت ليك أنو عمد منطقة شندي وغربها وما حولها كلهم شايقية عدا عمدة المتمة فقط هو الجعلي.
    ولقيت ليك الشايقية هم الماسكين الطين والزراعة والعندهم الرأس والأساس في جنوب شندي كلها أمسك من حوش بانقا وأنت نازل الدويمات قندتو ود بانقا ومن بعد حجر العسل والبسابير ومن الشرق السيال والهوبجي وسلوة وحجر الطير كل الرجال الرجال شايقية.
    وعندي وأحد صاحبي حبوبتهم شايقية وهو حساني من حجر العسل بعدين ما شاء الله وضعهم مروق قام قال لي مرة كان معاهم جدهم من أخوالهم الشايقية وفي مجلس قام ينعل هو في الشايقية ما تعرف الشايقية شنو؟ وما شايف خالوا .
    قال ليك خالو جاهو ناطي قال ليهو يا ولد والله أنت لو ما لحيمة الشايقية الحصلنا بيها دي والله كان جاري في الخلاء ترعى في الغنم أقعد يا ولد وأمسك خشمك يا عربي يا مقطع.
    قال لي ما قدرت أتكلم تاني.
    وفي الختام لكم الود
    avatar
    مرتضى خليفة

    عدد المساهمات : 175
    نقاط : 289
    تاريخ التسجيل : 11/05/2010

    رد: شوايقة يارسول الله

    مُساهمة  مرتضى خليفة في الأحد 29 أغسطس 2010 - 5:32

    الاخ امير تحياتى ،، أظنك ممغوص مغصة من شلتك المعاك دى وياخوى الجعليين هم فى معظمهم شوايقة نازحين ومهاجرين قعدو على امتداد شريط النيل وبقو أسياد بلد طبعآ ما رجالة ولا فهلوة لكن بالذكاةء والفطنة ،،،، وعشان أصحابك ديل مايزعلو نديهم هدية بسيطة

    جعلي زوجته ولدت الساعة 3 صباحا جابت بنت الجعلي قام خنقها وقال ليها ما عندنا بنات بجو الساعة3 صباحآ
    جعلي ماشي في شارع ضيق جداً ( زقاق ) وفي أول الزقاق دا كان في واحد شايل عكاز كبير و ساكي ليه كلب ؛ لمان شاف الجعلي في نهاية الزقاق قال ليه حوش الكلب ، واخونا الجعلي حاول يحوش الكلب ، لكن الكلب كان خايف من العكاز و جاء قاصد ليك الجعلي عديل ، فما كان من الجعلي إلا ينط من أقرب حيطة خوفاً من الكلب ؛ بعدين الجعلي اتحرج شديد جداً و اتعقد من الموقف دا ؛ فقام طوالي ماشي ليك للزول الساكي الكلب وراح هارشو ليك : إنت حيوان دا زقاق يسكو فيهو كلب ؟؟

    جعلي مشى عيد ميلاد صاحبه لما خلص العيد قال ليه : حرم عيد ميلادك عندي بكره


    avatar
    mawia abdelhfee

    عدد المساهمات : 75
    نقاط : 98
    تاريخ التسجيل : 24/05/2010

    من معاوية

    مُساهمة  mawia abdelhfee في الأحد 29 أغسطس 2010 - 5:41

    [size=18]الاخ الامير
    السلام عليكم ورحمة اللة
    تحية طيبة
    يمكن ما نعرف بعض لكن اديتني احساس انو السويقات دي بلد بعيدة من الكاسنجرمع انو السويقات قديما هي جز من الكاسنجر
    امدرسة الكاسنجر الابتدائية والمتوسطة هي للجميع من الكوع وحتي السويقات
    شيخ الكاسنجر واحد جدنا شيخ سيدداحمد من الكوع حتي السويقات
    مازون الكاسنجر عمنا حاج البشير من الكوع حتي السويقات
    عربية الكاسنجر عربية جدنا حاج علي من الكوع حتي السويقات
    بعد السواقي مباشرتا جاب جدنا علي عقيد البوابير وبدو الناس يرو بيها في الكاسنجر من الكوع حتي السويقات

    وزمان لو بتذكر كرامة صديق كانت في منطقة واحدة في العالم وهي منطقة الكاسنجر من الكوع حتي السويقات بالمناسبة في الجرف كانت مافي
    وزمان ناس الكوع والسويقات كان بقولو نحن من الكاسنجر
    لكن جات الانقاذ ولقت قصة العمودية وجابت حاجة اسمها لجنة شعبية فجاطت الشغلانة
    لكن اسللك يا امير منو من الكاسنجر ماعندو اهل في السويقات ووالعكس
    منو من الكاسنجر ماعندو طين في الكاسنجر والعكس[/size]
    avatar
    أمير الماحي البقاري

    عدد المساهمات : 18
    نقاط : 22
    تاريخ التسجيل : 29/07/2010

    رد خاص

    مُساهمة  أمير الماحي البقاري في الأحد 29 أغسطس 2010 - 7:12

    الأخ معاوية
    ما أظنك قريت ردودي للأخ مرتضى بتمعن
    وما أظن أنا قلت ناس الكاسنجر ما أهلي
    ولو قريت أنا قلت أولاد عمي العوناب عندكم وقلت أهلنا ناس الفاناب والكوع والجزائر وديل كلهم أنا ماني مارق منهم.
    ومرتضى الأنا قاعد أرد عليهو ده زاتو قريبي .
    وبالنسبة للمدرسة أنا ذاتي قريت في الكاسنجر الإبتدائية وعمك على الحاج سيد العربية ذاتو قريبي وود عود هو والبقاري أولاد خالات.
    ولو قريت بتمعن أنا قلت ليهو لا يعدو الأمر مزاح يتكرر حتى عندكم بين ناس الصعادة والطرف.
    ويمكن أنا عندي أهل في الكاسنجر أكثر منك أنت القاعد فيها.
    ولا شنو؟
    وأنا عارف أنو بس الصعادة أو ولع الواحد فيهم أكبر من السويقات بي عربها الفوق.
    لكن كل الكلام أنا ما بعدت الكاسنجر مني .
    راجع بتمعن وأرجع لي.
    avatar
    mawia abdelhfee

    عدد المساهمات : 75
    نقاط : 98
    تاريخ التسجيل : 24/05/2010

    رد: شوايقة يارسول الله

    مُساهمة  mawia abdelhfee في الأحد 29 أغسطس 2010 - 9:03

    الاخ الا مير
    تحية طيبة
    شكللك اخدت الموضوع بية حساسية شوية
    لكن انا بقصد انو زمان ما كان في حاجة اسمها كوع وسويقات وطرف صعادة بالمعني الموجود الان
    كانت كمناطق جز لايتجز من الكاسنجر مناطق اسما داخلية لينا نحن ناس الكاسنجر يعني زمان واحد من السويقات او الكوع او الطرف او الصعادة يمشي منطقة اخري او ولاية تانية بسالو انت من وين بقول من الكاسنجر (دا المعني المقصود)
    فلك العتبي حتي ترضي
    (وانا عندي اهل في الكاسنجر اكتر منك انت القاعد فيها)
    في دي صعبتعها شوية لكن ما علينا
    نتمنا ان نلتقي وتدوم المعرفة والتواصل
    my mobile 0918213648
    معاوية عبد الحفيظ

    avatar
    أمير الماحي البقاري

    عدد المساهمات : 18
    نقاط : 22
    تاريخ التسجيل : 29/07/2010

    رد: شوايقة يارسول الله

    مُساهمة  أمير الماحي البقاري في الإثنين 30 أغسطس 2010 - 5:02

    العزيز معاوية
    السلام عليكم ورحمة الله وبركاته،،،

    طبعاً أولاً حفظت التلفون وسأراجعك فيه وأتواصل معاك إن شاء الله,
    بالنسبة للمقطع
    (وانا عندي اهل في الكاسنجر اكتر منك انت القاعد فيها)

    أأنا ما كنت قاصد إلا إنك لمن قلت لي كانو ناس السويقات جزء تاني من الكاسنجر ومافي زول في السويقات إلا وعندو أهل في الكاسنجر.
    فوضحت لك بأني لا أنكر الكاسنجر ومعظم الكاسنجر إن لم يكن كلها من قرابتي.
    وأنا أفرق عنك وأتفوق عنك في هذه النقطة بأن ناس الكوع والفاناب وجزر الكاسنجر وغربها من الكنيسة والدقاويت وإقري كلهم أهلي لأمي (يعني من ناحية الوالدة) عشان كدة يمكن أنت جزائر الكاسنجر والكوع ما أظن عندك فيها إلا القليل لكن لي الكثير.
    زيادة على أن الطرف والعاصاب والعوناب ديل أهلي وما أظن العندي في ولع شوية يمكن الصعادة ما أظن عندي فيها إلا النسب والله أعلم.


    ولك الود حتى ترضى.
    avatar
    أمير الماحي البقاري

    عدد المساهمات : 18
    نقاط : 22
    تاريخ التسجيل : 29/07/2010

    ويييييييييييييييييييين الناس

    مُساهمة  أمير الماحي البقاري في الثلاثاء 21 سبتمبر 2010 - 7:40

    الأخوة الأعزاء
    معليش الظاهر الشغلانة بتاعتي شردتكم من الموقع.
    يا أخي الحكاية لا تعدو المداعبة والنقاش.
    وخلي البورد مدعاة لذلك.
    وللنسأل طالما جبنا الحكاية في موقع الأخ مرتضى الجعلي
    يا جماعة الشايقية عندنا في المنطقة منو؟
    ولتكن دعوة لأهلنا النوبة الأصلييين أصحاب البلد ناس ترهاقا العظيم
    الناس الأحتوت الناس وقدمت لها البلد والزوجة والأرض والحلال.
    ناس الكرم وييييييييييييييييييين.
    وأصحاب المنطقة المهاجرين من المناطق الآخرى.

    ولنبدأ واحد واحد
    ولتكن دعوة للمداعبة والمراجعة والونسة الطيبة الماعندها أي خلفيات أو دغائن أو فلا!
    لتكن دعوة للحنية والمحنة وغرز الشوق في وظناً جزورنا مغروزة في كل حناياهوا جرف جرف.
    وليكم كل ودي
    avatar
    مرتضى خليفة

    عدد المساهمات : 175
    نقاط : 289
    تاريخ التسجيل : 11/05/2010

    رد: شوايقة يارسول الله

    مُساهمة  مرتضى خليفة في الثلاثاء 21 سبتمبر 2010 - 8:05

    العزيز أمير الماحى لك التحية أعتقد إنو الناس ماشردوا من الموقع لأنو أى زول عارف انو الحصل كان مداعبة خفيفة وونسة ودى حاجة مطلوبة ومرغوبة فى مثل هذه المواقع ،،، يمكن الفترة الفاتت معظم الناس سافروا العيد فى البلد والنت طبعآ هناك مامتاح زى هنا عشان ةكدة كانت ةمعظم أقسام المنتدى شبه خالية من المشاركات ،،، إنت يا أمير معظم أعضاء المنتدى يمكن مابيعرفوك وما حصل ليهم الشرف إنو شافوك عشان كدى حقو نسعى لأقامة برنامج تعريفى لكل أعضاء المنتدى يتم فيه التعارف أكتر بين الناس خاصة الناس الما عاشو فى البلد والأعضاء الاعزاء من خارج الكاسنجر وبعد كدا التواصل حيكون أسهل
    avatar
    أمير الماحي البقاري

    عدد المساهمات : 18
    نقاط : 22
    تاريخ التسجيل : 29/07/2010

    تعريف

    مُساهمة  أمير الماحي البقاري في الأربعاء 22 سبتمبر 2010 - 2:42

    العزيز الغالي مرتضى
    والله كلامك وجيه للغاية
    معظم الناس في الموقع لا تعرفني والأنا بعرفو بيكون من خلال الإسم
    وده لأني ما عشت في البلد كثير وأظن بيكون في ناس كتير ذي.
    عشان كده أنا حا أبدا أعرف نفسي وإن شاء الله الباقين وإلى الأمام
    الأسم: أمير الماحي عبد الوهاب علي الطيب (الشهير بالبقاري)
    الوطن: السويقات - العوناب
    الدراسة: بدأت الدراسة بمدرسة الكاسنجر حتى الصف الثالث الإبتدائي.
    ولي فيها ذكريات جميلة مع أصدقاء وأبناء دفعة من الكاسنجر والسويقات والكوع والجزائر.
    وحكمة ربنا معظم الأخوان ما نسيتهم والبنساهو بس يذكر لي أسمه اتذكره ومعظم دفعة الجامعة القريبة الواحد نساها.
    أكملنا كل الدراسة الأولية حتى الثانوي في مدينة كوستي الحبيبة إلى القلب والتي أصبحت أكثر من وطن.
    وبعد ذلك الجامعة في جامعة السودان - هندسة ميكانيكية. تخرجت منها 1993م
    عملت في جامعة الخرطوم كلية العلوم قسم الفيزياء حوالي السنة إلى سنتين ومن هناك إلى السعودية جدة.
    عملت في التكييف والتبريد المركزي والحمد لله كانت لي بصمات الواحد يحمد الله عليها في مدينة جدة.
    الأن أعمل في التكييف فقط في شركة تابعة لدانفوديو منذ 2006، وبداءت معهم مطار مروي والحمد لله دانفوديو شركة ذات مشاريع لا تتوقف.
    السكن : منذ 1990م في الكدرو منطقة السلمة وهي منطقة أشبه بالشمالية كلها من نوري والقرير والباوقة وحجر العسل.
    وهي أصبحت أشبه بمجموعة أهل .
    تلفوني: 0909421155
    ومرحب بمعرفة الكل.


      الوقت/التاريخ الآن هو الإثنين 24 يوليو 2017 - 11:51